خود کو حساس ادارے کا افسر ظاہر کرکے اغواء برائے تاوان کی وارداتیں کرنے والا ملزم گرفتار
کراچی (ڈیلی پاکستان آن لائن) پولیس اور قانون نافذ کرنے والے ادارے نےشہریوں کو اغوا کر کے تاوان وصول کرنےوالے گروہ کے سرغنہ کو گرفتار کرلیا۔
پولیس کے مطابق گرفتار ملزم کی شناخت منصور حسن ولد سید نگار احمد کے نام سے ہوئی جو لوگوں کو اغوا کرتا تھا اور بعدازاں مغوی کے اہلخانہ کو حساس ادارے کا افسر بن کر کال کرتا اور مغوی کو چھڑانے کے عوض بھاری رقم کا تقاضہ بھی کرتا تھا، گرفتار ملزم مغوی کی رہائی کے عوض رقم نہ دینے پر اہل خانہ کو سنگین نتائج کی دھمکیاں بھی دیتا تھا۔پولیس کے مطابق ملزم انتہائی شاطر ہے جسے گزری پولیس اور قانون نافذ کرنے والے ادارے نے سخت جدوجہد کے بعد اپنے جال میں پھنسا کر گرفتار کیا جبکہ گروہ میں شامل ملزم کے دیگر ساتھیوں کی گرفتاری کے لیے چھاپے مارے جا رہے ہیں۔ ملزم کے خلاف گزری تھانے میں مقدمہ بھی درج ہے جس میں ملزم منصور حسن نے ایک شہری کو اغوا کر کے اس کے چچا سے 25 لاکھ روپے کا مطالبہ کیا بعدازاں 10 لاکھ روپے وصول کرنے کے بعد مغوی شہری عاشر کو چھوڑ دیا گیا تھا۔
