”گانا لکھ لیا ہے ،ویڈیو زیرو بجٹ میں بنے گی “علی ظفر نے اعلان کردیا اور ساتھ ہی عوام سے بڑی مدد مانگ لی

لاہور (ڈیلی پاکستان آن لائن )معروف گلو کار علی ظفر نے پی ایس ایل کا گانا اپنے طور پر بنانے کا چیلنج قبول کرنے کے بعد اس پر تیزی کے ساتھ کام شروع کردیا ہے اور گانے کے بول بھی لکھ دئیے ہیں ۔نجی نیوز چینل سماءنیوز سے بات کرتے ہوئے انہوں نے بتا یا کہ میرے پاس گانا بنانے کے لیے بہت کم وقت ہے لیکن میں نے اس پر کام شروع کیا ہوا ہے ،گانے کے بول لکھ لیے ہیں اس کی کمپوزنگ پر کام ہو رہا ہے ۔ان کا کہنا تھا کہ گانے کی آڈیو چند دن میں مکمل ہو جائے گی لیکن ویڈیو کے لیے عوام کا تعاون درکار ہو گا ۔علی ظفر نے عوام سے مدد مانگتے ہوئے کہاکہ اس گانے کی ویڈیو عوام بنائے گی ،میں اپنے گانے کی بیٹس سوشل میڈ یا پر شیئر کروں گا جس پر لوگوں کو ہائی ریزولیشن ویڈیو بنا کر ڈانس کریں گے ،بہترین ڈانسر کو ویڈیو میں شامل کیا جائے گا اور یہ ویڈیو زیرو بجٹ کی ہو گی ۔