خورشید شاہ نے شہباز شریف کو مداری قرار دے دیا

خورشید شاہ نے شہباز شریف کو مداری قرار دے دیا
خورشید شاہ نے شہباز شریف کو مداری قرار دے دیا

اسلام آباد (ڈیلی پاکستان آن لائن) قومی اسمبلی میں قائد حزب اختلاف خورشید شاہ نے وزیر اعلیٰ پنجاب کو مداری قرار دے دیا ۔ انہوں نے کہا کہ قصور جیسے واقعات پر ہم شرمسار ہیں اور وزیراعلیٰ پنجاب تالیاں بجوا رہے ہیں، شہباز شریف سیاستدان تو نظر نہیں آتے وہ مداری ہیں ۔

قومی اسمبلی میں اظہار خیال کے دوران قائد حزب اختلاف سید خورشید شاہ وزیر اعلیٰ پنجاب پر سخت برہم نظر آئے ۔ انہوں نے کہا کہ شہباز شریف نے پریس کانفرنس میں زینب کے والد کے سامنے تالیاں بجوا کرمعصوم بچی کے والدین کے زخموں پر نمک چھڑکا، شہباز شریف کو خود کو سیاستدان کہتے ہوئے شرم آنی چاہیے۔ انہیں اخلاقیات کا کچھ پتا نہیں، شہباز شریف مداری ہیں سیاستدان نظر نہیں آتے، مکروہ غلیظ آدمی پکڑا گیا تو اس کا مطلب یہ نہیں کہ تالیاں بجوائی جائیں، بادشاہ بے شرمی کے ساتھ تالیاں بجوا رہا تھا۔

خورشید شاہ کا کہنا تھا کہ قصور جیسے واقعات پر ہم شرمسار ہیں اور وزیراعلیٰ پنجاب تالیاں بجوا رہے ہیں، پارلیمان کو اس بات پر غور کرنا چاہیے، یہ انسانی حقوق کا مسئلہ ہے، کل جس نے بھی پریس کانفرنس دیکھی اس کا سر شرم سے جھک گیا ہوگا، پارلیمان وزیراعلیٰ کے خلاف اس معاملے پر مذمتی قرارداد لائے۔

ان کا کہنا تھا کہ پنجاب میں امن و امان کی صورتحال باقی صوبوں سے ابتر ہے۔ 2017 میں پنجاب میں زیادتی کے 43 کیس رجسٹرڈ ہوئے، 2016 میں لاہور میں 51 زیادتی کے کیسز ہوئے، قصور میں 66، مظفرگڑھ میں 43 اور لودھراں میں بھی زیادتی کے واقعات رونما ہوئے، شہباز شریف ناکام ترین وزیراعلیٰ ہیں۔

مزید : اہم خبریں /قومی /علاقائی /اسلام آباد

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...