آشیانہ ہاؤسنگ کیس میں شہباز شریف کے جوڈیشل ریمانڈ میں توسیع
لاہور(ڈیلی پاکستان آن لائن) عدالت نے سابق وزیراعلیٰ پنجاب شہباز شریف کے جوڈیشل ریمانڈ میں 15 روز کی توسیع کردی۔
قومی اسمبلی میں اپوزیشن لیڈر شہباز شریف کے خلاف آشیانہ ہاؤسنگ کیس کی سماعت ہوئی جس میں جیل حکام نے شہباز شریف کو پیش نہ کرنے سے متعلق رپورٹ پیش کردی، رپورٹ میں کہا گیا کہ سپیکر قومی اسمبلی نے شہباز شریف کے پروڈکشن آرڈر جاری کررکھے ہیں لہٰذا قومی اسمبلی کے اجلاس میں شرکت کے باعث شہباز شریف کو پیش نہیں کیا جاسکا۔
نیب پراسیکوٹر نے کہا کہ آشیانہ اقبال سکینڈل کیس میں ملزمان کو ریفرنس کی صاف کاپیاں فراہم کر دی گئیں،بعض دستاویزات چائنیز زبان میں ہیں جن کا ترجمہ کرکے کاپیاں آئندہ سماعت پر ملزمان کو فراہم کردی جائیں گی۔
دوسری جانب سابق وزیراعظم نوازشریف کے پرسنل سیکرٹری فواد حسن فواد اور سابق ڈی جی ایل ڈی اے احد چیمہ سمیت چند دیگر ملزمان کو بھی عدالت میں پیش کیا گیا۔ بعد ازاں عدالت نے شہبازشریف، احد چیمہ،فواد حسن فواد کے جوڈیشل ریمانڈ میں 15 روز کی توسیع کرتے ہوئے کیس کی سماعت 7 فروری تک ملتوی کردی۔