”میں نے دوسری جگہ سے ٹیسٹ کروایا ہے جو منفی آیا اور۔۔۔“ محمد حفیظ نے تہلکہ خیز انکشاف کر دیا

”میں نے دوسری جگہ سے ٹیسٹ کروایا ہے جو منفی آیا اور۔۔۔“ محمد حفیظ نے تہلکہ ...
”میں نے دوسری جگہ سے ٹیسٹ کروایا ہے جو منفی آیا اور۔۔۔“ محمد حفیظ نے تہلکہ خیز انکشاف کر دیا

  

لاہور (ڈیلی پاکستان آن لائن) پاکستان کرکٹ بورڈ (پی سی بی) کی جانب سے کروائے گئے کورونا ٹیسٹ کی رپورٹ مثبت آنے پر محمد حفیظ نے نجی لیبارٹری سے دوبارہ ٹیسٹ کروایا جو منفی آیا ہے جس سے مثبت رپورٹ ہونے والے دیگر کرکٹرز کے ٹیسٹوں پر بھی سوالیہ نشان لگ گیا ہے۔

تفصیلات کے مطابق کرکٹر محمد حفیظ نے سماجی رابطوں کی ویب سائٹ ٹوئٹر پر جاری پیغام میں لکھا ”پی سی بی کی جانب سے کرائے جانے والے کورونا ٹیسٹ کا نتیجہ مثبت آنے کے بعد اپنی تسلی اور احتیاط کو ملحوظ خاطر رکھتے ہوئے نجی لیبارٹری سے اپنا اور اپنے اہل خانہ کا ٹیسٹ کروایا اور سب کی رپورٹس ہی منفی آئی ہیں، اللہ کا شکر ہے اور وہ ہم سب کو اپنی حفاظت میں رکھے۔“

واضح رہے گزشتہ روز پی سی بی کی جانب سے کورونا ٹیسٹ کروائے گئے تھے جن میں محمد حفیظ کا رزلٹ بھی مثبت آیا تھا جس پر محمد حفیظ نے سوشل میڈیا پیغام میں مداحوں کو اپنی صحت کے حوالے سے آگاہ کرتے ہوئے لکھا تھا کہ مجھ میں کورونا کی علامات ظاہر نہیں ہوئیں جبکہ میں معمول کے مطابق پریکٹس اور ورزش بھی کر رہا ہوں اور اپنے آپ کو صحت مند محسوس کر رہا ہوں۔

محمد حفیظ کی جانب سے نجی لیبارٹری سے ٹیسٹ منفی آنے کے بعد دیگر 10 کرکٹرز کی کورونا رپورٹس پر بھی سوالیہ نشان لگ گیا ہے جنہیں دورہ انگلینڈ کیلئے قومی سکواڈ میں منتخب کیا گیا اور پی سی بی کی جانب سے ان کے کورونا ٹیسٹ کرانے پر نتائج مثبت آئے اور اب تمام کھلاڑی از خود قرنطینہ اختیار کئے ہوئے ہیں۔

مزید :

کھیل -