پنجاب حکومت نے 3برسوں میں ریکارڈ ترقیاتی کام کرائے: وزیر اوقاف

      پنجاب حکومت نے 3برسوں میں ریکارڈ ترقیاتی کام کرائے: وزیر اوقاف

  

 لاہور(فلم رپورٹر) صوبائی وزیر اوقاف سید سعید الحسن شاہ نے کہا کہ وزیراعظم عمران خان اور وزیر اعلیٰ عثمان بزدار کی قیادت میں پنجاب حکومت نے تین سال میں ریکارڈ کام کیے ہیں، پنجاب حکومت نے پہلی مرتبہ جنوبی پنجاب کی عوام کو انکا حق دیا ہے،34 فیصد ترقیاتی بجٹ سے جنوبی پنجاب میں ترقی و خوشحالی کا نیا باب کھلے گا۔صوبائی وزیر اوقاف سعید الحسن شاہ نے ان خیالات کااظہار ملاقات کیلئے آنے والے مختلف وفود سے گفتگو کرتے ہوئے کیا۔ صوبائی وزیر اوقاف سید سعید الحسن شاہ نے کہاکہ صوبے کی سو فیصد آبادی کو ہیلتھ کارڈ مہیا کیا جا رہا ہے،جس سے صحت کے شعبہ کو بڑے پیمانے پر فروغ ملے گا۔عوام کو پینے کا مصفا پانی مہیا کرنے کے لئے پنجاب آب پاک اتھارٹی کے ذریعے صوبہ بھر میں 6 ہزار پلانٹس لگا ئے جا رہے ہیں۔ انہوں نے کہا کہ پنجاب حکومت نے سماجی ترقی اور بہبود پر مبنی بجٹ پیش کیا۔ حکومت سو فیصد سکولوں کو پرائمری سے ایلیمینٹری سکولوں ک درجہ دے رہی ہے۔وزیر اعلیٰ پنجاب کی ہدایت پرساڑھے آٹھ ہزار سکولوں کو اس سال اپ گریڈکیا جا رہا ہے۔ضلعی ترقیاتی بجٹ سے صوبے کا ہر گلی محلہ ترقی کی راہ پر گامزن کیا جا رہا ہے۔

 وزیر اعلیٰ پنجاب کی بہترین حکمت عملی نے کسان دوست پالیسی کی بنا پر زراعت کے شعبہ میں انقلاب برپا کردیا ہے۔ پی ٹی آئی حکومت نے دن رات ایک کرکے تین سال بعد حقیقی عوام دوست بجٹ پیش کیا۔سوشل سیکٹر کی تعمیروترقی کا عمل حکومت کا اہم مشن ہے۔حکومت کاروباری دوست ماحول کے ذریعے پنجاب کو انڈسٹری کی پروان کا ہب بنائے گی۔ حکومت کا تعلیم اور انفراسٹرکچر میں سرمایہ کاری اولین ترجیحات میں شامل ہے۔ 

مزید :

میٹروپولیٹن 1 -