عمران خان نے مجھ سے رابطہ منقطع کر دیا، چیئر مین پی سی بی وزیراعظم شہباز شریف کے ساتھ کام کرنے کے خواہاں
لاہور(ڈیلی پاکستان آن لائن)چیئر مین پی سی بی رمیز راجہ نے انکشاف کیا کہ عمران خان نے وزارت عظمیٰ سے ہٹائے جانے کے فوراً بعد ان سے رابطہ منقطع کر دیا۔ رمیز راجہ نے اپنے سابق کپتان کے ساتھ تعلقات کے بارے میں پوچھے گئے سوال کا جواب دیتے ہوئے کہا کہ عمران بھائی نے مجھ سے رابطہ منقطع کر دیا، میں نے ان سے کافی عرصے سے بات نہیں کی ۔
پریس کانفرنس میں انہوں نے کہا کہ ہم قیاس آرائیوں کے ارد گرد نہیں رہ سکتے۔ میرا ماننا ہے کہ سیاسی اختلافات کے علاوہ تسلسل کی ضرورت ہے۔ سابق ٹیسٹ کرکٹر کا کہنا تھا کہ ’دیکھیں، ہمارے وزیر اعظم ہمارے سرپرست اعلیٰ ہیں، ہم نے ان سے وقت مانگا ہے اور اگر وہ ہم سے ملیں گے تو ہم انہیں اپنے کام کے بارے میں بتائیں گے۔ میرے خیال میں یہاں انا کی کوئی ضرورت نہیں ہے، آخر میں، ہم سب کرکٹ کی ترقی چاہتے ہیں۔
انہوں نے کہا کہ اگر آئین میں ہر بار چیئرمین پی سی بی کو ہٹانے کے بارے میں کچھ ہے تو اسے آگے بڑھائیں، ورنہ انفرادی خواہشات کی تکمیل کھیل کے حق میں کام نہیں کرے گی۔ پی سی بی کے باس نے مزید کہا کہ گیند وزیراعظم شہباز شریف کے کورٹ میں ہے۔ واضح رہے کہ وزیراعظم شہبازشریف نے چند روز قبل پی سی بی کے سابق چیئرمین خالد محمود سے ملاقات کی تھی۔ اطلاعات کے مطابق پی سی بی کی چیئرمین شپ ان کی ملاقات میں سب سے اوپر رہی۔
