سعودی عرب میں یوم پاکستان پورے جوش و خروش اور قومی ولولے سے منایا گیا

جدہ (محمد اکرم اسد) سعودی عرب میں یوم پاکستان پورے جوش و خروش اور قومی ولولے سے منایا گیا۔ دن کا آغاز سفیر پاکستان منظور الحق نے پاکستان ایمبیسی ریاض اور قونصل جنرل شہریار اکبر نے اپنی رہائشگاہ پر قومی پرچم لہراکرکیا جسے پاک آرمی اور پاک بحریہ کے دستوں نے سلامی دی۔ اس موقع پر کمیونٹی کی بڑی تعداد موجود تھی۔ دونوں تقاریب میں صدر پاکستان اور وزیراعظم پاکستان کے یوم پاکستان کی مناسبت سے موخیل پیغامات پڑھ کر سنائے گئے۔ قونصل جنرل نے اپنے خطاب میں کہا کہ آج کا دن بڑی اہمیت کا ہے یہ تجوید عہد کا دن ہے۔ آج پاکستان کو جن حالات کا سامنا ہے اور پاکستان اس وقت دہشتگردوں کی لپیٹ میں ہیں لیکن ہماری پاک افواج ہر چیلنجز سے نمٹنے کی صلاحیت رکھتی ہیں۔ ضرب عضب کامیابی سے دہشتگردوں کے خلاف جاری ہے اور جلد ہی کامیابی سے ہمکنار ہوگا۔ انہوں نے کہا کہ سبز ہلالی پرچم کا احترام اور اسے اقوام عالم میں سربلند رکھنا ہر پاکستانی پر فرض ہے۔ انہوں نے کہا کہ جس ملک میں ہم رہتے ہیں ہم سب کا فرض ہے کہ وہاں کے مقامی قوانین کا احترام کریں، آپ کے عمل کا براہ راست اثر وطن عزیز پرمرتب ہوتا ہے۔ ہمیں اپنے آپ کو کسی طرح کے غیر قانونی کاموں میں ملوث نہیں کرنا چاہیے کیونکہ ملک کی بدنامی کا باعث بنتا ہے۔قونصل جنرل نے یہ اعلان بھی کیا کہ قونصلیٹ کی نئی عمارت کی تعمیر کے لئے پاکستان سے منظوری حاصل کرلی ہے، جلد ہی عمارت کا نقشہ بھی منظور ہوجائے گا اور تعمیر کا کام پھر شروع کریں گے۔ انہوں نے بتایا کہ موجودہ قونصلیٹ کی عمارت میں کمیونٹی کی سہولت کے لئے متعدد اقدامات کئے گئے ہیں جبکہ معزز خواتین کی سہولت اور انہیں قونصلر سروسز فراہم کرنے کے لئے خواتین پر مشتمل سٹاف تعینات کیا گیا ہے تاکہ پردہ دار خواتین کو کسی قسم کی دشواری نہ ہو۔ انہوں نے نادرہ سے شناختی کارڈ آن لائن کے آغاز کا بھی اعلان کیا اور کہا کہ اب گھر بیٹھے درخواست جمع کرائی جاسکتی ہے اور جو لوگ مختلف شہروں میں مقیم ہیں وہ آنے کی زحمت سے بچ سکیں گے۔ انہوں نے موجودہ عمارت کے حوالے سے کہا کہ جب میں آیا تو میرے پیش نظر ہموطنوں کو مزید سہولتیں دینے اور معاملات کو بہتر کرنا تھا جس کے لئے مختلف اقدامات کئے گئے، جن میں خواتین کے لئے بیت الخلاءکی ضرورت کو دیکھتے ہوئے اضافی بیت الخلاءتعمیر کرائے گئے، پاسپورٹ سیکشن میں مزید کرسیوں کا انتظام کیا گیا، پاسپورٹ کے حصول کے لئے آن لائن ٹوکن سسٹم کی گنجائش بڑھا کر تین سو افراد یومیہ تک کردی گئی تاکہ وہ اپنے وقت پر آکر وقت کی بچت کریں۔ انہوں نے کہا کہ میرے لئے سب ہموطن ایک جیسے ہیں کوئی تفریق نہیں۔ ڈپٹی قونصل جنرل سروس سعید نے صدر مملکت اور ہیڈ آف چانسلری جنید علی وزیر نے وزیراعظم کا قوم کے نام پیغامات پڑھ کر سنائے۔ بعدازاں ناشتے سے حاضرین کی تواضع کی گئی۔