قائد اعظم کے فرمودات پر عمل کرنا وقت کا تقاضا ہے،بلال شیرازی

قائد اعظم کے فرمودات پر عمل کرنا وقت کا تقاضا ہے،بلال شیرازی

  IOS Dailypakistan app Android Dailypakistan app


لاہور(جنرل رپورٹر) مسلم لیگ کے رہنما و مسلم لیگ یوتھ ونگ کے مرکزی صدر سید بلال مصطفی شیرازی نے کہا ہے کہ23مارچ ہماری تاریخ میں تجدید عہد کا دن ہے۔ قائداعظم کی قیادت میں اتحاد اور عمل پیہم ہی تھا جس کی بناء پر 7 سال بعد پاکستان وجود میں آیاقائد اعظم محمد جناحؒ کے فرمان ایمان ،اتحاد ، تنظیم ، یقین محکم پر عمل کرنے کی آج سب سے زیادہ ضرورت ہے ، اس مملکت خدا داد کو داخلی ، خارجی طور پر خطرات اور چیلنج درپیش ہیں ۔ بانی پاکستان کے افکار و فرمودات پر عمل پیرا ہوکر ہی ملک کو بحرانوں سے نکالا جاسکتا ہے انہوں نے کہا کہ قائد اعظم محمد علی جناح ؒ ملت اسلامیہ خصوصاً برصغیر کے مسلمانوں کے لیے اللہ تعالیٰ خاص انعام تھے ۔قوم قائد اعظمؒ کے احسانات کا بدلہ نہیں اتار سکتی ۔بانی پاکستان نے مایوسی اور ناامیدی کی فضا میں عزم و حوصلہ کا چراغ چلایا اور اپنی لیاقت ، ہمت ، معاملہ فہمی سے برصغیر کے مسلمانوں کیلئے ایک آزاد ریاست کے خواب کو شرمندہ تعبیر کیا۔ ان خیالات کا اظہار انہوں نے 23مارچ کے موقع پر یوتھ ونگ کے مرکزی عہدیداران سے گفتگو کرتے ہوئے کیا ۔ سیدبلال مصطفی شیرازی نے کہا کہ قائد اعظم ؒ کی سیاسی فکر کو بھولنا بڑی بدقسمتی ہے بابائے قوم کے نقش قدم پر چلتے ہوئے ملک کی خدمت میں کوئی کسر نہ اٹھا رکھی جائے قائد اعظم برصغیر کے مسلمانوں کے محسن ہیں ان کی قیادت میسر نہ ہوتی تو پاکستان معرض وجود میں نہ آتا، ساری زندگی پاکستانی قوم ان کے احسانات کا بدلہ نہیں اتار سکتی ۔