پیغام پاکستان ہی ہمارا متفقہ بیانیہ جو ہر قسم کی دہشتگردی کی نفی کرتا ہے :سردار محمد یوسف
اسلام آباد (این این آئی)وفاقی وزیر مذہبی امور و بین المذاہب ہم آہنگی سردار محمد یوسف نے کہا ہے کہ پیغام پاکستان ہی ہمارا متفقہ بیانیہ ہے جو ہر قسم کی دہشت گردی، عسکریت پسندی، تکفیریت کی نفی کرتا ہے۔ وہ یوم پاکستان کے موقع پر بین الاقوامی اسلامی یونیورسٹی کے ادارہ تحقیقات اسلامی کے زیر اہتمام منعقدہ بین الاقوامی کانفرنس سے بطور مہمان خصوصی خطاب کررہے تھے جس کا اہتمام بین الاقوامی معزز مہمانوں کو پیغام پاکستان سے روشناس کرانا تھا۔ کانفرنس کی صدارت مصر کے مفتی اعظم شوقی ابراہیم عبدالکریم کر رہے تھے۔ وفاقی وزیر نے کہا کہ مختلف مکاتب فکر سے تعلق رکھنے والے 1800 سے زائد علماء نے اس اعلامیہ پر دستخط کئے ہیں تاکہ دنیا کو جو اسلام مخالف پروپیگنڈے میں مصروف رہی ہے کو بتایا جا سکے۔ پیغام پاکستان ہی ہمارا متفقہ بیانیہ ہے جو ہر قسم کی دہشت گردی، عسکریت پسندی، تکفیریت کی نفی کرتا ہے۔ انہوں نے کہا کہ یہی ہمارا قومی بیانیہ متفقہ اسلامی بیانیہ ہے جو 1400 سال پہلے اللہ اور اس کے رسول حضرت محمد ؐ کے ذریعے پوری دنیا میں پھیلا۔ انہوں نے کہا کہ امام کعبہ نے بھی پیغام پاکستان کے بیانیہ کی توثیق کی اور متفقہ بیانیہ کو ایک بڑی کامیابی قرار دیا ہے۔ انہوں نے مفتی اعظم مصر کا بھی شکریہ ادا کیا جنہوں نے پیغام پاکستان کو عربی زبان میں شائع کرا کے مصر میں عام کرنے کا یقین دلایا ہے۔ حکومت نے متفقہ قومی بیانیہ لانے کی ذمہ داری کوپورا کیا اور اس ضمن میں ادارہ تحقیقات اسلامی کی کاوشیں قابل تحسین ہیں۔ کانفرنس میں بین الاقوامی اسلامی یونیورسٹی کے صدر ڈاکٹر یوسف الدرویش نے خطبہ استقبالیہ پیش کیا اور بین الاقوامی اسلامی یونیورسٹی کے شعبہ تحقیقات اسلامی کا مختصر تعارف پیش کیا اور پیغام پاکستان کی کوششوں میں شریک فیکلٹی اراکین، دانشوروں، علماء اور محققین کی کاوشوں کی تعریف کی۔ کانفرنس سے بہاؤ الدین زکریا یونیورسٹی کے وائس چانسلر پروفیسر طاہر امین، ڈاکٹر عثمان مصطفی، پارلیمانی سیکرٹری موسمی تغیرات رومینہ عالم، علامہ طاہر محمود اشرفی، منصور قاضی اور دیگر نے بھی خطاب کیا ۔
ٗسردار محمد یوسف