انیس صدیقی کی بے رحمانہ طریقے سے ٹارگٹ کلنگ ہوئی، قاتلوں کوگرفتارکرکے کڑی سزا دی جائے: فاروق ستار

کراچی (ڈیلی پاکستان آن لائن)ایم کیو ایم پی آئی بی کے رہنما فاروق ستار نے کہا ہے کہ انیس صدیقی کی بے رحمانہ طریقے سے ٹارگٹ کلنگ کی گئی ہے، قاتلوں کوگرفتارکرکے کڑی سے کڑی سزا دی جائے۔
ایم کیو ایم کے جنرل کونسلرانیس صدیقی کی اورنگی ٹاؤن میں نمازہ جنازہ میں شرکت کے بعد فاروق ستار نے میڈیا سے گفتگو کرتے ہوئے کہا کہ ایم کیوایم پاکستان کودیوارسے لگایاگیاہے اور اس پرمظالم کیے گئے ہیں۔انہوں نے کہا کہ انیس صدیقی کوگزشتہ روزبے رحمانہ طریقے سے قتل کیاگیا۔ انیس صدیقی کی ٹارگٹ کلنگ کی گئی ہے،ایم کیو ایم کے منتخب نمائندوں کوقتل کیاجارہاہے،یہ بڑاظلم ہے۔انیس صدیقی کے قاتلوں کوگرفتارکرکے کڑی سے کڑی سزا دی جائے۔انہوں نے مزید کہا کہ کب تک ہمارے کارکنوں اورنمائندوں کے قتل کاسلسلہ جاری رہے گا؟قانون نافذکرنےوالے ادارے اپنی کارکردگی سامنے لائیں۔فاروق ستار نے کہا کہ کراچی میں مردم شماری کے دوران مہاجروں کوکم گناگیاہے۔ایم کیوایم کوتقسیم کرنےکی سازشوں کوکامیاب نہیں ہو نے دیں گے۔ان کا کہنا تھا کہ انہوں نے کبھی ایم کیوایم سے الگ ہونا چاہا ہے اور نہ ہی الگ جماعت بنائی۔بہادرآبادوالوں نے اپنی الگ تقریب رکھی تومجبوراًجلسہ کرناپڑا۔انہوں نے خالدمقبول کویوم تاسیس کی تقریب میں شرکت کی دعوت دی۔فاروق ستار نے کہا کہ سینیٹ انتخابات کے دوران ہارس ٹریڈنگ کی گئی ہے۔
واضح رہے کہ جمعہ کے روز قتل ہونے والے ایم کیو ایم کے جنرل کونسلرانیس صدیقی کی اورنگی ٹاؤن میں نمازہ جنازہ ادا کردی گئی ہے۔نماز جنازہ میں فاروق ستار،خالد مقبول صدیقی،وسیم اختر اور ایم کیو ایم کے دیگررہنما ﺅں نے شرکت کی۔