پی ایس ایل فائنل، سیکیورٹی پلان کو حتمی شکل دے دی گئی

کراچی(ڈیلی پاکستان آن لائن) پاکستان سپر لیگ کے فائنل میچ سے متعلق سیکیورٹی پلان کو حتمی شکل دے دی گئی جس کے تحت8 ہزار سے زائد سیکیورٹی اہلکاروں کو تعینات کیا جائے گا۔
تفصیلات کے مطابق صوبہ سندھ کے دارالحکومت کراچی میں پاکستان سپر لیگ کے فائنل میچ کے پیش نظر نیشنل سٹیڈیم اور اطراف کے علاقوں میں سیکیورٹی کے سخت انتظامات کیے گئے ہیں۔پلان کے مطابق 8 ہزار سے زائد سیکیورٹی اہلکاروں کو تعینات کیا جائے گا۔ فائنل کے لیے ٹریفک پولیس کے انتظامات بھی مکمل کرلیے گئے ہیں۔ کرکٹ میچ دیکھنے کے لیے آنے والوں کے لیے 3 مقامات سے شٹل سروس چلائی جائے گی۔پارکنگ پوائنٹس سے گراونڈ منتقلی کے لیے اردو یونیورسٹی اور حکیم سعید گراونڈ سے شٹل سروس چلے گی، علاوہ ازیں بیت المکرم مسجد کے قریب واقع گراونڈ سے بھی شٹل سروس چلے گی۔فائنل کے لیے 16 سو اہلکار ٹریفک کا نظام سنبھالیں گے۔ فائنل والے دن کارساز سے عام ٹریفک کا داخلہ بند ہوگا جبکہ یونیورسٹی روڈ سے دائیں جانب سٹیڈیم جانے والا ٹریک بھی بند ہوگا۔
سیکیورٹی پلان کے تحت فائنل والے دن نیو ٹاون اور ڈالمیا روڈ بھی ٹریفک کے لیے بند ہوگا۔ شائقین کو صرف شٹل سروس کے ذریعے سٹیڈیم جانے کی اجازت ہوگی۔
پاکستان سپر لیگ کا فائنل میچ کل 25 مارچ کو پشاور زلمی اور اسلام آباد یونائیٹڈ کے درمیان منعقد ہوگا۔