ایشیاء کپ 2023 پاکستان میں ہی ہونے امکان، بھارت کیساتھ میچز کیلئے نیوٹرل وینیو میں انگلینڈ بھی شامل
لاہور (ویب ڈیسک) ایشیاء کپ 2023 پاکستان میں ہی ہونے امکان ہے جبکہ بھارت کے میچز کیلئے انگلینڈ بھی نیو ٹرل وینیوز کی فہرست میں شامل ہے۔کرکٹ ویب سائٹ کرک انفو کے مطابق نیوٹرل وینیو کا حتمی فیصلہ نہیں ہو سکا ہے، یو اے ای ، عمان اور سری لنکا بھی اس فہرست میں شامل ہیں۔
رپورٹ کے مطابق پاکستان اور بھارت کے میچز پاکستان سے باہر نیوٹرل وینیو پر ہونے کا امکان ہے، نیوٹرل وینیو پر 5میچز کرانے کی منصوبہ بندی کی جا رہی ہے۔ان5 میچز میں پاکستان اور بھارت کے درمیان کم از کم 2 میچز بھی شامل ہیں۔
6 ملکی ایشیاء کپ کیلئے پاکستان اور بھارت کوالیفائر ٹیم کے ساتھ ایک گروپ میں ہیں، سری لنکا افغانستان اور بنگلا دیش ایک گروپ میں ہیں۔"جیو نیوز" کے مطابق ایشیاء کپ ستمبر میں شیڈول ہے جو کہ 50 اوورز کے فارمیٹ پر مشتمل ہے۔ یو اے ای میں ایشین کرکٹ کونسل (اے سی سی) اجلاس میں مختلف آپشنز پر غور ہوا تاہم حتمی فیصلہ نہیں ہوسکا ہے۔
اس سال بھی ایشیا ءکپ 2022 کے فارمیٹ کے مطابق کھیلا جائے گا، پاکستان اور بھارت کے درمیان3 مرتبہ مقابلہ متوقع ہے۔ایشیا ءکپ کی میزبانی پاکستان کے پاس ہے، ایشیا ءکپ کے شیڈول ٹریول پلان کیلئے ورکنگ گروپ تشکیل دے دیا گیا ہے، حتمی فیصلے سے قبل براڈ کاسٹرز سے بھی مشاورت کی جائے گی، پاکستان کے علاوہ نیوٹرل وینیو پر میچز کیلئے موسم بھی اہمیت کا حامل ہو گا، لندن جیسے وینیو پر ایشین کراؤڈ بہت زیادہ متوقع ہوتا ہے۔اے سی سی کے اجلاس میں پاکستان سے باہر میچز کرانے پر اتفاق کیا گیا ہے۔ اے سی سی کا اجلاس آئی سی سی اجلاس کی سائیڈ لائنز پر ہوا، اجلاس میں پاکستان کرکٹ بورڈ کے چیئرمین نجم سیٹھی شریک ہو ئے جبکہ بھارت کی طرف سے اجلاس میں جے شاہ تھے۔
اجلاس میں بھارت نے پاکستان نہ جانے کے اپنے مؤقف کو دہرایا جبکہ پاکستان نے پورا ٹورنامنٹ پاکستان سے باہر لے جانے کا فیصلے کیے جانے کی صورت میں ٹورنامنٹ سے دستبردار ہونے کا کہہ دیا ہے۔سری لنکا کرکٹ نے ایشیا ءکپ کے تبادلے کا کہا لیکن پاکستان نے میزبانی بدلنے پر آمادگی ظاہر نہ کی۔پاکستان اور بھارت2 جگہوں پر ایشیا ءکپ کے انعقاد کیلئے بظاہر رضامند ہیں البتہ 2 جگہوں پر ایشیا ءکپ کے انعقاد انحصار لاجسٹکس پر ہوگا۔
