ٹیسٹ کرکٹر توفیق عمر کا کرونا وائرس ٹیسٹ مثبت آ گیا
لاہور (ڈیلی پاکستان آن لائن) پاکستان کے ٹیسٹ کرکٹر توفیق عمر کا کرونا وائرس ٹیسٹ مثبت آگیا ہے جس کے بعد انہوں نے خود کو اپنے گھر میں قرنطینہ کر لیا ہے البتہ ان کے اہل و عیال اور دیگر میل جول رکھنے والے افراد سے متعلق تاحال کوئی معلومات حاصل نہیں ہو سکیں۔
تفصیلات کے مطابق 38 سالہ اوپنر توفیق عمر 20جون 1981ءکو لاہور میں پیدا ہوئے جنہوں نے 44 ٹیسٹ اور 22 ایک روزہ میچز میں پاکستان کی نمائندگی کرتے ہوئے ٹیسٹ کرکٹ میں 7 سنچریوں اور 14 نصف سنچریوں کی مدد سے 2963 رنز بنائے جبکہ ایک روزہ کرکٹ میں تین نصف سنچریوں کی مدد سے 504 رنز سکور کرنے میں کامیاب ہوئے۔
توفیق عمر نے کرونا وائرس کا ٹیسٹ مثبت آنے پر ازخود گھر میں قرنطینہ ہونے کا فیصلہ کیا ہے تاہم ابھی تک یہ معلوم نہیں ہو سکا کہ ان کے اہل و عیال اور دوست احباب بھی اس وائرس سے متاثر ہوئے ہیں یا نہیں، اور یہ بھی پتہ نہیں چل سکا کہ وہ اس دوران کن افراد سے ملاقاتیں کرتے رہے ہیں۔
واضح رہے کہ توفیق عمر نے اپنے کیریئر کا پہلا ٹیسٹ میچ 29سے 31اگست 2001ءمیں بنگلہ دیش کے خلاف کھیلا جبکہ آخری ٹیسٹ میچ 17 سے 21 نومبر 2014ءکے دوران نیوزی لینڈ کیخلاف کھیلا تھا۔ یاد رہے کہ دنیا بھر میں پھیلی عالمی وبا کورونا وائرس ہر گزرتے دن کے ساتھ پاکستان میں مزید زور پکڑ رہی ہے اور گزشتہ 24 گھنٹوں کے دوران 2164 نئے کیسز سامنے آئے ہیں جس کے بعد 24 مئی تک پاکستان میں مصدقہ کیسز کی مجموعی تعداد 54 ہزار 601 جبکہ اموات 1133 ہو گئی ہیں۔