سلے سلائے ملبوسات کی برآمدات میں کمی ریکارڈ
مکوآنہ (این این آئی)ملک سے سلے سلائے ملبوسات کی برآمدات میں جاری مالی سال کے پہلے 10 ماہ میں سالانہ بنیادوں پر10 فیصدکی کمی ریکارڈکی گئی ہے۔پاکستان بیوروبرائے شماریات اورسٹیٹ بینک کی جانب سے اس حوالہ سے جاری کردہ اعدادوشمارکے مطابق جولائی سے اپریل تک کی مدت میں سلے سلائے ملبوسات کی برآمدات سے ملک کو2.90 ارب ڈالرکازرمبادلہ حاصل ہواجوگزشتہ مالی سال کی اسی مدت کے مقابلہ میں 10 فیصدکم ہے، گزشتہ مالی سال کی اسی مدت میں سلے سلائے ملبوسات کی برآمدات سے ملک کو3.21 ارب ڈالرکازرمبادلہ حاصل ہواتھا، اپریل میں سلے سلائے ملبوسات کی برآمدات کاحجم 247 ملین ڈالرریکارڈکیاگیا جوگزشتہ سال اپریل کے مقابلہ میں 29فیصدکم ہے، گزشتہ سال اپریل میں سلے سلائے ملبوسات کی برآمدات سے ملک کو351 ملین ڈالرکازرمبادلہ حاصل ہواتھا۔
، مارچ کے مقابلہ میں اپریل میں سلے سلائے ملبوسات کی برآمدات میں ماہانہ بنیادوں پر10 فیصدکی کمی ہوئی ہے، مارچ میں سلے سلائے ملبوسات کی برآمدات سے ملک کو276 ملین ڈالرکازرمبادلہ حاصل ہواتھاجواپریل میں کم ہوکر247 ملین ڈالرہوگیا، واضح رہے کہ جاری مالی سال کے پہلے 10 ماہ میں ٹیکسٹائل گروپ کی برآمدات میں سالانہ بنیادوں پر14.2 فیصدکی کمی ریکارڈکی گئی ہے۔
