دیور کے ہاتھوں عروسی لباس میں ملبوس نئی نویلی دلہن کی پٹائی، ویڈیو وائرل ہوگئی
نئی دہلی(مانیٹرنگ ڈیسک) برصغیر میں شادی رسوم و روایات سے بھرپور تہوار ہوتا ہے، کچھ رسومات تو لگ بھگ ہر جگہ یکساں ہیں لیکن بعض رسمیں علاقوں اور ثقافتوں کے لحاظ سے مختلف ہوتی ہیں۔ ایسی ہی ایک رسم بھارت کے کچھ علاقوں میں پائی جاتی ہے جس کی ایک ویڈیو نے ان دنوں انٹرنیٹ صارفین کو ورطہ حیرت میں ڈال رکھا ہے۔
نیوز ویب سائٹ اوڑیسا ٹی وی کے مطابق اس رسم میں جب دلہن بیاہ کر سسرال آتی ہے تو اسے اور اس کے دیور کو چھڑیاں پکڑا دی جاتی ہیں اور دونوں ایک دوسرے کو ان چھڑیوں سے علامتی طور پر پیٹتے ہیں۔ اس ویڈیو میں دیور بھابی کو درخت کی ٹہنیاں پکڑائی گئی ہوتی ہیں جن سے انہوں پتوں کی طرف سے ایک دوسرے کو علامتی طور پر پیٹنا ہوتا ہے لیکن دیور شرارت کرتا ہے اور ٹہنی پتوں والے حصے کی بجائے لکڑی والے حصے کی طرف سے پورے زور سے اپنی بھابی کو دے مارتا ہے۔
View this post on Instagram
دیور کی یہ حرکت دیکھ کر بھابی بھی ٹہنی کو الٹاتی ہے اور لکڑی والے حصے سے پوری قوت کے ساتھ اپنے دیور کو پیٹنا شروع کر دیتی ہے۔ ایک دوسرے پر چند وار کرنے پر ہی دونوں کی ٹہنیاں ٹوٹ جاتی ہیں۔ اس ویڈیو پر کمنٹس میں لوگ اس عجیب رسم پر حیرت کا اظہار کر رہے ہیں۔ اکثر لوگ دیور کو تنقید کا نشانہ بنا رہے ہیں کہ اسے اپنی نئی نویلی بھابی کے ساتھ ایسا سلوک نہیں کرنا چاہیے تھا۔
