مسلمان باہمی ہم آہنگی اور اتحاد کے ساتھ کام کریں ،صدر ممنون حسین

مسلمان باہمی ہم آہنگی اور اتحاد کے ساتھ کام کریں ،صدر ممنون حسین

اسلام آباد(آن لائن)صدر مملکت ممنون حسین نے کہا ہے کہ اسلام اور مسلمانوں کے خلاف پروپیگنڈے کے سدباب کے لیے دنیا بھر کے مسلمان باہمی آہنگی اور اتحاد کے ساتھ کام کریں۔ اس مقصد کے لیے رابطہ عالم اسلامی کا پلیٹ فارم بہت موزوں ہے۔ صدر مملکت نے یہ بات رابطہ عالم اسلامی کے سیکرٹری جنرل عبداللہ بن عبدالمحسن الترکی سے بات چیت کرتے ہوئے کہی جنہوں نے آج ایوانِ صدر میں اْن سے ملاقات کی۔ اس موقع پر وفاقی وزیر برائے مذہبی اْمور سرادار محمد یوسف، وزیرمملکت برائے مذہبی اْمور پیر محمد امین الحسنات، وفاقی سیکرٹری مذہبی اْمور اور عامر سہیل اور ممتاز عْلمائے کرام بھی موجود تھے۔صدرمملکت ممنون حسین نے کہا کہ اسلام میں اختلاف رائے کی گنجائش موجود ہے لیکن اپنا مسلک کسی دوسرے پر مسلط کرنے کی اجازت نہیں ہے۔ اس سلسلے میں موتمر اپنے پلیٹ فارم سے مثبت کردار ادر کرسکتی ہے۔ صدر مملکت نے کہا کہ دہشت گردی کی وجہ سے پاکستان میں ساٹھ ہزار افر اد شہید ہو چکے ہیں اور اس ناسور کے خاتمے کے لیے پاکستان نہایت سنجیدگی سے کام کر رہا ہے۔ انہوں نے کہا کہ دہشت گردی کے خاتمے کے لے طاقت کے استعمال کے ساتھ ساتھ دیگر ذرائع اختیار کرنے کی بھی ضرورت ہے تاکہ لوگوں کوشدت پسندی کی طرف مائل ہونے سے روکا جاسکے۔ صدرمملکت نے کہا کہ مسلمان ممالک کو چاہیے۔ کہ وہ تجارت، تعلیم اور خاص طورپر سائنس اور ٹیکنالوجی کے شعبوں میں باہمی تعاون میں اضافہ کریں تاکہ مسلم دنیا میں ترقی اور خوش حالی کا حصول ممکن ہو سکے۔ رابطہ عالم اسلامی کے سیکرٹری جنرل عبداللہ بن عبدالمحسن الترکی نے اس موقع پر صدر مملکت کے خیالات کی تائید کی اور کہا کہ ان کا ادارہ شدت پسندی اور جہالت کے خاتمے کے لیے سنجیدگی کے ساتھ کام کر رہا ہے۔ انہوں نے کہا کہ پاکستان پوری مسلم دنیا کی اْمیدوں کا مرکز ہے۔

مزید : کراچی صفحہ اول