برسبین ٹیسٹ پر آسٹر یلیا کی گرفت مضبوط

برسبین ٹیسٹ پر آسٹر یلیا کی گرفت مضبوط

  



برسبین (اے پی پی) پاکستانی ٹیم آسٹریلیا کے خلاف برسبین ٹیسٹ میچ میں شدید مشکلات کا شکار ہوگئی، گرین کیپس کو اننگز کی شکست سے بچنے کیلئے 276 رنز درکار ہیں جبکہ اس کی 7 وکٹیں باقی ہیں، ٹیسٹ کے تیسرے روز آسٹریلوی ٹیم اپنی پہلی اننگز میں 340 رنز کی برتری کے ساتھ 580 رنز بناکر آؤٹ ہوگئی، مارنس لابوشین نے 185 رنز کی دلکش اننگز کھیلی، یاسر شاہ نے 4 کھلاڑیوں کو آؤٹ کیا، پاکستان کی 64 رنز پر 3 وکٹیں گر گئیں، شان مسعود 27 اور بابر اعظم 20 رنز کے ساتھ ناٹ آؤٹ ہیں، مچل سٹارک نے دو وکٹیں حاصل کیں۔ ہفتہ کو برسبین کرکٹ گراؤنڈ میں ٹیسٹ کے تیسرے روز آسٹریلیا نے 312 رنز ایک کھلاڑی آؤٹ پر اننگز دوبارہ شروع کی تو ڈیوڈ وارنر گزشتہ روز کے سکور میں صرف تین رنز کا اضافہ کرنے کے بعد نسیم شاہ کی گیند پر محمد رضوان کے ہاتھوں کیچ آؤٹ ہوگئے، اس طرح نوجوان فاسٹ باؤلر نے کیریئر کی پہلی وکٹ حاصل کی، ڈیوڈ وارنر نے 154 رنز کی شاندار اننگز کھیلی، سٹیون سمتھ زیادہ دیر وکٹ پر نہ ٹھہر سکے اور 4 رنز بناکر یاسر شاہ کی گیند پر کلین بولڈ ہوگئے، اس موقع پر مارنس لابوشین اور میتھیو ویڈ نے ذمہ داری سے بیٹنگ کی اور 110 رنز کی شراکت قائم کرکے ٹیم کا سکور 468 تک پہنچا دیا، لابوشین نے کیریئر کی پہلی سنچری بنائی، میتھیو ویڈ 60 رنز بنانے کے بعد حارث سہیل کی گیند پر کیچ آؤٹ ہوگئے، تراوس ہیڈ کو بھی حارث سہیل نے 24 کے انفرادی سکور پر رضوان کے ہاتھوں کیچ آؤٹ کرایا، کپتان ٹم پائن 7 رنز بناکر شاہین شاہ کا نشانہ بنے، مارنس لابوشین نے کیریئر بیسٹ اننگز کھیلی اور 185 رنز بنانے کے بعد شاہین شاہ کی گیند پر کیچ آؤٹ ہوگئے، مچل سٹارک 5، پیٹ کمنز 7 اور جوش ہیزلووڈ 5 رنز بناکر آؤٹ ہوگئے، نیتھن لائن 13 رنز کے ساتھ ناٹ آؤٹ رہے، اس طرح آسٹریلوی ٹیم اپنی پہلی اننگز میں 340 رنز کی برتری کے ساتھ 580 رنز بناکر آؤٹ ہوگئی، یاسر شاہ نے 4 کھلاڑیوں کو آؤٹ کیا،حارث سہیل اور شاہین شاہ نے دو، دو جبکہ نسیم شاہ اور عمران خان نے ایک، ایک وکٹ حاصل کی۔ پاکستان کی اننگز کا آغاز انتہائی مایوس کن رہا اور اس کے ٹاپ تین بلے باز 25 کے مجموعی سکور پر پویلین واپس لوٹ گئے، کپتان اظہر علی 5 اور حارث سہیل 8 رنز بناکر مچل سٹارک کا شکار بنے جبکہ اسد شفیق کو پیٹ کمنز نے صفر پر آؤٹ کر دیا، شان مسعود اور بابر اعظم نے تیسرے دن کھیل کے اختتام تک مزید کوئی نقصان نہ ہونے دیا اور ٹیم کا سکور 64 تک پہنچا دیا، شان مسعود 27 اور بابر اعظم 20 رنز کے ساتھ ناٹ آؤٹ ہیں، پاکستان کو اننگز کی شکست سے بچنے کیلئے مزید 276 رنز درکار ہیں۔

مزید : کھیل اور کھلاڑی