وزیراعلیٰ سندھ کی فیصل واوڈا کو والو مین کی نوکری کی پیشکش

سکھر(اے این این) وزیراعلیٰ سندھ سید مراد علی شاہ نے پی ٹی آئی رہنما اور وفاقی وزیر آبی وسائل فیصل واوڈ کو والو مین کی نوکری دینے کی پیشکش کردی۔

سکھر میں میڈیا سے گفتگو کرتے ہوئے مراد علی شاہ نے کہا کہ کم عقل لوگ 18 ویں ترمیم رول بیک اور این ایف سی میں حصہ کم کرنےکی باتیں کررہے ہیں، حکومت میں آنا آسان ہے، حکومت کرنا الگ چیز ہے، کچھ کہوں گا تو بر امان جائیں گے، فیصل واوڈا حکومت کرنا سیکھیں دھمکیاں نہ دیں، سندھ پاکستان کا حصہ ہے، مدد کریں احسان نہیں ہوگا۔وزیراعلیٰ سندھ کا کہنا تھا فیصل واوڈا نے کہا کہ پانی کا والو بند کردوں گا،وہ والو مین نہیں ہیں، انہیں والو مین کی نوکری چاہیے تو میں دینے کو تیار ہوں۔

مراد علی شاہ نے مزید کہا کہ نوازشریف نےکراچی کیلئے 25 ارب کا اعلان کیا لیکن 25 روپےخرچ نہیں کیے۔ایک سوال کے جواب میں وزیراعلیٰ سندھ کا کہناتھا کہ چیف جسٹس جو ریکارڈ مانگ رہے ہیں وہ ہم فراہم کررہے ہیں، جےآئی ٹی نےورکس اینڈ سروسز اور ایری گیشن کے 46 کنٹریکٹرز کی تفصیلات مانگی ہیں، سندھ حکومت کے دس سال کےسارے اکائونٹس کی تفصیلات مانگی گئی ہیں، 27 ہزار اکائونٹ ہیں، فہرست اور اسٹیٹمنٹ چھوٹا کام نہیں، دو، تین دن میں نہیں ہوگا۔

مراد علی شاہ نے کہا کہ وفاقی حکومت لوگوں کوگھر دے رہی ہے، یہ اچھی بات ہے، 50 لاکھ گھروں کا تخمینہ 180 ارب ڈالر سنا ہے، سی پیک میں 35 ارب ڈالر کی سرمایہ کاری ہے، سی پیک اور ملک کے 20،25 سال کی جی ڈی پی ملاکر بھی یہ پیسے نہیں بنتے۔