ٹانک: مسلح افراد نے گرلز پرائمری سکول دھماکے سے تباہ کردیا

ٹانک(ڈیلی پاکستان آن لائن)خیبرپختونخوا کے ضلع ٹانک میں گزشتہ شب نامعلوم مسلح افراد نے گرلز پرائمری سکول کو بم سے اڑا دیا۔

روزنامہ ’’جنگ‘‘ کے مطابق ڈسٹرکٹ پولیس آفیسر ضلع ٹانک شبیر حسین شاہ کے مطابق ٹانک کے نواحی علاقے گرہ بڈھا میں نامعلوم مسلح افراد نے گزشتہ شب گرلز پرائمری سکول کو بم سے اڑایا۔

دہشتگردوں نے سکول کی عمارت میں بم نصب کیا تھا جو زوردار دھماکے سے پھٹا جس کی آواز دور دور تک سنی گئی، دھماکے سے سکول کی عمارت مکمل طور پر تباہ ہوگئی۔

علاقے کے عمائدین کے مطابق ضلع بھر میں امن و امان کی صورتحال انتہائی غیر تسلی بخش ہے اور کسی کا جان و مال محفوظ نہیں ہے۔

واضح رہے کہ اس سے قبل بھی کئی تدریسی عمارتوں کو نقصان پہنچایا جاچکا ہے۔