نیو یارک(ڈیلی پاکستان آن لائن) وزیراعظم شہباز شریف کی اقوام متحدہ کی جنرل اسمبلی کے 80ویں اجلاس کے موقع پر ورلڈ بینک گروپ کے صدر اجے بنگا سے ملاقات ہوئی جس میں اصلاحاتی ایجنڈے اور ترقیاتی شراکت داری سمیت اہم امور پر تبادلۂ خیال کیا گیا۔
نجی ٹی وی چینل’’ دنیا نیوز‘‘ کے مطابق وزیراعظم نے ورلڈ بینک کو زیادہ مؤثر اور تیز تر ترقیاتی شراکت دار میں تبدیل کرنے پر اجے بنگا کی قیادت کو سراہا اور کورونا وباء اور 2022 کے تباہ کن سیلاب کے دوران پاکستان کے لیے ورلڈ بینک کی معاونت کو قابل قدر قرار دیا۔
شہباز شریف نے عالمی بینک کے صدر کو حکومت کے جامع اصلاحاتی ایجنڈے سے آگاہ کیا جس میں وسائل کے مؤثر استعمال، توانائی کے شعبے کی اصلاحات، نجکاری اور موسمیاتی تبدیلی سے بچاؤ کے اقدامات شامل ہیں۔
ان کا کہنا تھا کہ یہ اصلاحات پاکستان کو معاشی استحکام، سرمایہ کاروں کے اعتماد کی بحالی اور پائیدار ترقی کی راہ پر گامزن کر رہی ہیں۔
وزیراعظم نے ورلڈ بینک کے نئے کنٹری پارٹنرشپ فریم ورک (2035-2026) کو بھی سراہا جس کے تحت پاکستان کے لیے 40 ارب امریکی ڈالر زکی تاریخی سرمایہ کاری کا اعلان کیا گیا ہے، انہوں نے اس کے مؤثر نفاذ کے لیے وفاقی و صوبائی حکومتوں کے قریبی تعاون کے عزم کا اعادہ کیا۔
صدر ورلڈ بینک اجے بنگا نے پاکستان کے اصلاحاتی اقدامات کو مثبت قرار دیتے ہوئے ترقیاتی ایجنڈے، اقتصادی اصلاحات اور موسمیاتی تبدیلی کے خلاف طویل المدتی اقدامات میں تعاون جاری رکھنے کے عزم کا اظہار کیا۔