سوات (بیورورپورٹ)سیکرٹری اطلاعات و تعلقات عامہ خیبرپختونخوا محمد بختیار خان اور ڈائریکٹر جنرل اطلاعات و تعلقات عامہ خیبرپختونخوا محمد عمران کی خصوصی ہدایت پر عمل درآمد کے حوالے سے ریجنل انفارمیشن آفیسر سوات خان سرور وزیر نے اپنے دفتر میں سوات پرنٹنگ پریس کے کابینہ نے صدر جمیل احمد کی قیادت میں ملاقات کی۔ ملاقات میں پرنٹنگ پریس صنعت کو درپیش مسائل پر سیر حاصل گفتگو ہوئی اور ان کے مسائل اور سیلاب سے ہونے والے نقصانات کا جائزہ لیا گیا اس موقع پر ریجنل انفارمیشن آفیسر نے پرنٹنگ پریسوں کے ڈیکلریشن سرٹیفکیٹس، سالانہ رینیول کے حوالے سے تبادلہ خیال کیا۔ اور یہ فیصلہ کیا کہ غیر رجسٹرڈ پرنٹنگ پریس کو فوری طور پر محکمہ اطلاعات و تعلقات عامہ سے رجسٹرڈ کرایا جائے گا، بصورت دیگر ان کے خلاف قانونی کارروائی عمل میں لائی جائے گی۔خان سرور وزیر نے اس موقع پر کہا کہ محکمہ اطلاعات و تعلقات عامہ پرنٹنگ پریس مالکان کو قدر کی نگاہ سے دیکھتا ہے اور ان کے تمام مسائل کے حل کے لیے ہر ممکن تعاون فراہم کیا جائے گا۔ انہوں نے مزید کہا کہ پرنٹنگ پریس کے کاروبارسے منسلک حضرات معاشرے میں ایک اہم کردار ادا کرتے ہیں اس لیے ان کے مسائل کے حل کے لیے محکمہ اطلاعات و تعلقات عامہ کلیدی کردار ادا کرتا رہے گا۔ملاقات کے موقع پر آل سوات پرنٹنگ پریس ایسوسی ایشن کے صدر جمیل احمد نے کہا کہ پرنٹنگ پریسوں کی رجسٹریشن، سالانہ رینیول کے حوالے سے محکمہ اطلاعات و تعلقات عامہ کے ساتھ مکمل تعاون کیا جائے گا۔ اور سوات، بونیر اور شانگلہ میں قائم غیر رجسٹرڈ پرنٹنگ پریسوں کو رجسٹرڈ کیا جائے گا اور صوبائی حکومت کی ہدایات پر سختی سے عمل درآمد یقینی بنایا جائے گا۔ ملاقات کے دوران سیلاب سے متاثرہ پرنٹنگ پریسوں کے مسائل پر بھی گفتگو ہوئی، جس پر ریجنل انفارمیشن آفیسر نے افسوس کا اظہار کرتے ہوئے ہر قسم کے تعاون کی یقین دہانی کرائی۔