لاہور ( ڈیلی پاکستان آن لائن ) وزیر اعلیٰ پنجاب مریم نواز سے پاک سوزوکی کے منیجنگ ڈائریکٹر ہیرو شی کاوا مورا نے ملاقات کی۔ پاک سوزوکی کے منیجنگ ڈائریکٹر ہیرو شی کاوا مورا نے سیلاب زدگان کے لیے 30 ملین روپے کا چیک پیش کیا۔ پاک سوزوکی کے جنرل منیجر اخلاق احمد ورک، سید وجاہت اور محمد ذیشان بھی وفد میں شامل تھے۔
پاک سوزوکی کے اعلی سطح وفد نے سیلاب زدگان کے لئے ریسکیو اور ریلیف آپریشن کو سراہا۔ پاک سوزوکی وفد نے وزیر اعلیٰ اور انکی ٹیم کی شب و روز محنت کو قابل تحسین قرار دیا۔ وزیراعلیٰ نے گفتگو کرتے ہوئے کہا کہ پنجاب نے تاریخ کے سب سے بڑے اور بد ترین سیلاب کا پامردی سے سامنا کیا۔ پنجاب میں بروقت انخلاء اور ریسکیو ریلیف آپریشن سے لاکھوں جانیں بچانا ممکن ہوا۔ پنجاب میں نہ صرف انسانوں بلکہ22 لاکھ مویشیوں کی جان بھی بچائی گئی۔تھرمل کیمرے اور دیگر جدید ٹیکنالوجی سے سیلاب متاثرین تک رسائی اور انخلاء ممکن ہوا۔ آئندہ سیلاب کے آمد سے قبل ہی حفاظتی انتظامات یقینی بنانا چاہتے ہیں۔
پاک سوزوکی کے منیجنگ ڈائریکٹر ہیروشی کاوامورا نے کہا کہ پنجاب کی لیڈر شپ نے سیلاب متاثرین کے لیے مثالی خدمات سر انجام دیں۔ وزیراعلیٰ کی پوری ٹیم نے شاندار کارکردگی کا مظاہرہ کیا اور یہ کامیابی صرف مریم نواز کی شاندار قیادت کی وجہ سے ممکن ہوا۔وزیراعلیٰ جس طرح ٹیم کو لیڈ کرتی ہیں وہ سیلاب کے علاوہ بھی عام دنوں میں نظر آتا ہے۔ وزیراعلیٰ مریم نواز نے جو اقدامات کیے باقی صوبوں میں اس کی کوئی مثال نہیں ملتی۔