اسلام آباد (سٹاف رپورٹر)وفاقی وزیر برائے قانون و انصاف اور انسانی حقوق سینیٹر اعظم نذیر تارڑ سے یورپی یونین کے پاکستان میں سفیر رائموندس کاروبلس نے ملاقات کی۔دوران فریقین نے 2024ء میں شروع ہونے والے ’’حقوقِ پاکستان فیز II (ای یو حقوقِ پاکستان II)‘‘پروگرام کے تحت حاصل کی جانے والی پیشرفت کا جائزہ لیا۔
وفاقی وزیر نے پاکستان میں انسانی حقوق کے فروغ اور تحفظ کے لئے یورپی یونین کی مسلسل حمایت کو سراہا اور کہا یہ پروگرام حکومتی ڈھانچوں کو مضبوط بنانے، قومی انسانی حقوق کے اداروں کی استعداد بڑھانے، انسانی حقوق سے متعلق تعلیم اور آگاہی کو فروغ دینے اور کاروبار میں ذمہ دارانہ رویوں کی حوصلہ افزائی پر مرکوز ہے۔
وفاقی وزیر نے سفیر کو قومی ایکشن پلان برائے انسانی حقوق پر بھی بریف کیا جو اس وقت قانونی و پالیسی اصلاحات، انصاف تک رسائی، انسانی حقوق کی ترجیحات پر عملدرآمد، بین الاقوامی معاہدوں کی پاسداری، قومی اداروں کو مستحکم بنانے اور مؤثر مانیٹرنگ میکنزم قائم کرنے پر توجہ مرکوز کئے ہوئے ہے۔
یورپی یونین کے سفیر رائموندس کاروبلس نے ان اقدامات کو سراہا اور پاکستان کے ساتھ شراکت داری جاری رکھنے کے عزم کا اعادہ کیا۔ انہوں نے پروگرام کے تحت حاصل کی جانے والی پیشرفت پر اطمینان کا اظہار کیا اور اس بات پر زور دیا کہ یورپی یونین پاکستان کی انسانی حقوق کی ایجنڈے کو مزید آگے بڑھانے میں بھرپور تعاون جاری رکھے گا۔
ملاقات میں نومبر 2025ء میں منعقد ہونے والے جی ایس پی پلس مانیٹرنگ مشن کی تیاریوں پر بھی بات چیت ہوئی۔ دونوں فریقین نے اس بات پر اتفاق کیا کہ مثبت نتائج کے حصول کے لئے قریبی تعاون اور تعمیری روابط ناگزیر ہیں۔