دسمبر میں شارٹ فال کا نیا ریکارڈ 6ہزار میگا واٹ سے تجاوز کر گیا
لاہور(کامرس رپورٹر) ملک میں گزشتہ روز بھی بجلی کی بدترین لوڈ شیڈنگ کا سلسلہ جاری رہا ۔ دسمبر کے حوالے سے شارٹ فال کا نیا ریکارڈ قائم ہو گیا۔ بجلی کی پیداوار میں کمی کے باعث شارٹ فال چھ ہزار سے بھی تجاوز کر گیا ۔ اس سے قبل کسی بھی سال دسمبر میں شارٹ فال اس سطح پر نہیں آیا تھا۔ سردی کے لہر کے باعث ڈیمانڈ میں معمولی کمی ہوئی ۔ گزشتہ روز شہروں میں14گھنٹے اور دیہی علاقوں و چھوٹے شہروں میں 18گھنٹے تک لوڈ شیڈنگ کی گئی ۔ مرمت کے نام پر تمام سب ڈویژنوں میں تین تین فیڈرز دس دس گھنٹے کے لئے بند رکھے گئے ۔ رات کو لوڈ بڑھنے پر شہروں میں ایک گھنٹے بعد دو دو گھنٹے اور دیہی علاقوں میں پانچ پانچ گھنٹے تک کی لوڈ شیڈنگ کی گئی ۔ انرجی مینجمنٹ سیل کے ذرائع کے مطابق گزشتہ روز بجلی کی مجموعی ڈیمانڈ 13330 میگا واٹ جبکہ پیداوار 7320 میگاو اٹ رہی طلب و رسد میں 6110 میگاواٹ کا فرق رہا ۔