قلندر لڑ کر ہار گئے ، زلمی 17رنز سے کامیاب ، اسلام آباد نے کوئٹہ کو1رنز سے ہرا دیا

قلندر لڑ کر ہار گئے ، زلمی 17رنز سے کامیاب ، اسلام آباد نے کوئٹہ کو1رنز سے ہرا ...

دبئی (نیٹ نیوز) پاکستان سپر لیگ (پی ایس ایل) کے دوسرے ایڈیشن میں کامران اکمل کی شاندار بیٹنگ کی بدولت پشاور زلمی نے لاہور قلندر کو 17 رنز سے جبکہ اسلام آباد یونائیٹڈ نے کوئٹہ گلیڈایٹر کو سنسنی خیز مقابلے کے بعد 1رنز سے ہردیا۔تفصیل کے مطابق پشاورزلمی نے لاہور قلندرز کو ہرا کر تیسری کامیابی حاصل کی، اس فتح کے ساتھ زلمی کے پلے آف میچ میں پہنچنے کے امکانات روشن ہو گئے، لاہور قلندر کی ٹیم 166 رنز کے ہدف کے تعاقب میں مقررہ اوورز میں 9 وکٹوں پر 149 رنز بنا سکی، ڈیلپورٹ اور میک کولم نے ٹیم کو 38 رنز کا آغاز فراہم کیا تاہم ڈیلپورٹ کے آؤٹ ہوتے ہی قلندر کی وکٹیں خزاں رسیدہ پتوں کی طرح گرنا شروع ہو گئیں، قلندر نے 5 رنز پر 6 وکٹیں گنوائیں، سہیل تنویر 36 رنز بنا کر ناٹ آؤٹ رہے، شکیب الحسن کو 30 رنز اور 2 وکٹیں لینے پر میچ کے بہترین کھلاڑی کا ایوارڈ دیا گیا۔ جمعہ کو کھیلے گئے لیگ کے 16ویں میچ میں پشاور زلمی نے پہلے کھیلتے ہوئے مقررہ اوورز میں 6 وکٹوں پر 166 رنز کا مجموعہ ترتیب دیا، کامران اکمل 58 رنز کے ساتھ ٹاپ سکورر رہے، شکیب الحسن 30، محمدحفیظ 13، تمیم اقبال 5، مارلون سیموئلز 17 اور شاہد آفریدی 10 رنز بنا کر آؤٹ ہوئے، کپتان ڈیرن سیمی 17 رنز بنا کر ناٹ آؤٹ رہے، جواب میں لاہور قلندر کی ٹیم مطلوبہ ہدف حاصل کرنے میں ناکام رہی اور مقررہ اوورز میں 9 وکٹوں پر 149 رنز تک محدود رہی، ڈیلپورٹ اور میک کولم نے ٹیم کو 38 رنز کا جارحانہ آغاز فراہم کیا، اس موقع پر حسن علی نے ڈیلپورٹ کو آؤٹ کر کے ٹیم کو بڑی کامیابی دلائی، ڈیلپورٹ نے 15 گیندوں پر 7 چوکوں کی مدد سے 32 رنز بنائے، ان کے آؤٹ ہوتے ہی قلندر کی بیٹنگ لائن اپ لڑکھڑا گئی اور 43 کے سکور پر اس کے 6 مستند کھلاڑی آؤٹ ہو کر پویلین لوٹ گئے، کپتان میک کولم 6، فاخر زمان اور گرانٹ ایلیٹ صفر، عمراکمل ایک اور محمدرضوان 4 رنز بنا کر چلتے بنے، 88 کے سکور پر سنیل نارائن 21 رنز بنا کر وہاب ریاض کی گیند کا نشانہ بنے، 92 کے سکور پر قلندر کی آٹھویں وکٹ گری جب عامر یامین 25 رنز بنا کر سیمی کی گیند پر کیچ آؤٹ ہوئے، اس موقع پر سہیل تنویر اور یاسرشاہ حریف باؤلرز کے سامنے ڈٹ گئے، دونوں نے نویں وکٹ میں 55 رنز جوڑ کر سکور 147 تک پہنچا دیا تاہم اس کے باوجود وہ ٹیم کو شکست سے نہ بچا سکے، یاسرشاہ 22 رنز بنا کر شاہد آفریدی کی گیند کا نشانہ بنے، سہیل تنویر نے 36 رنز بنائے اور آؤٹ نہیں ہوئے، شکیب الحسن اور محمدحفیظ نے دو، دو جبکہ حسن علی، وہاب ریاض، ڈیرن سیمی اور شاہد آفریدی نے ایک، ایک کھلاڑی کو آؤٹ کیا۔دوسرے میچ میں اسلام آباد یو نائیٹڈ نے بیٹنگ کا آغاز کیا تو پہلے بلے باز ڈوین سمتھ تیسری ہی گیند پر بغیر کوئی سکور کئے پویلین لوٹ گئے جبکہ رفت اللہ مہمند 17 رنز بنانے کے بعد آؤٹ ہوئے۔تیسرے بلے باز حسین طلعت نے 56 رنز بناکر زوالفقار بابر کی گیند پر پریرا کے ہاتھوں کیچ آؤٹ ہوئے۔چوتھے بلے باز بریڈ ہیڈن بھی 22 رنز بنانے کے بعد پویلین لوٹ گئے۔کپتان مصباح الحق نے 25 سکور بنائے ۔کوئٹہ کی جانب سے ذوالفقار بابر اور انورعلی نے 2,2جبکہ حسن خان اور پریرانے ایک ایک کھلاڑی کو آؤٹ کیا۔جواب میں کھیلتے ہوئے کوئٹہ کی ٹیم 166کے ہدف کے تعاقب میں 165رنز بناسکی۔ کوئٹہ گلیڈ ایٹرز کے پہلے بلے باز اسد شفیق 8 رنز بنانے کے بعد محمد عرفان کی گیند پر کلین بولڈ ہوگئے،جس کے بعدکیون پیٹرسن اور احمد شہزاد نے وکٹ کو سنبھالا اور دونوں نے 128 رنز کی شاندار شراکت داری کی۔کیون پیٹر سن 69جبکہ احمد شہزاد 59 رنز بنانے کے بعد آؤٹ ہوئے۔ کپتان سرفراز احمد زیادہ سکور نہ کر سکے اور صرف 3 رنز بنانے کے بعد پویلین لوٹ گئے۔ بلے باز انور علی 2رنز بناسکے۔اسلام آباد یونائیٹڈ کی جانب سے محمد عرفان ، رومان رئیس ، شاداب خان اور محمد سمیع نے ایک ایک وکٹ حاصل کی۔

مزید : کھیل اور کھلاڑی


loading...