بھارت میں ہجوم کے ہاتھوں مرتے شخص کے ساتھ سیلفیاں

بھارت میں ہجوم کے ہاتھوں مرتے شخص کے ساتھ سیلفیاں

نئی دہلی(این این آئی)بھارت کی جنوبی ریاست کیرالہ میں چوری کے الزام میں ایک شخص کو ہجوم کی جانب سے جان سے مارنے کی ویڈیو وائرل ہونے کے بعد دو افراد کو حراست میں لے لیا ۔بھارتی ٹی وی کے مطابق اس واقعے کی ویڈیو نے اور اس کے ساتھ ساتھ اس بندھے ہوئے شخص کو مرتا دیکھ کر سیلفیاں بناتے ہوئے لوگوں کی تصاویر نے عوام میں تشویش کی لہر دوڑ گئی ہے۔مارے جانے والے شخص کی شناخت قبائلی کے طور پر ہوئی ہے جو اس علاقے میں رہتا تھا۔ پولیس کا کہنا تھا کہ وہ اس قتل میں ملوث دیگر افراد کو تلاش کر رہی ہے۔اعلیٰ پولیس اہلکار پرتیش کمار کا کہناتھا کہ اس شخص پر حملے کی اطلاع ملتے ہی اہلکاروں کی ایک ٹیم فوری طور پر ضلع پالاکڈ میں جائے وقوعہ پر پہنچ گئی تھی۔ان کے مطابق اہلکاروں نے فوری طور پر کارروائی کرتے ہوئے مادھو نامی اس شخص کو چھڑایا اور ہسپتال پہنچایا، تاہم وہ طبی امداد فراہم کرنے سے پہلے ہی ہلاک ہو گیا تھا۔اس واقعے کی ویڈیو اور تصاویر سے کیرالہ کے لوگوں میں خوف پھیل گیا، بعض ٹی وی چینلوں نے تو ان تصاویر میں سے بعض نشر بھی کر دیں ہیں ۔ریاست کے وزیر اعلیٰ نے کہا کہ حملہ آوروں کے خلاف سخت ایکشن لیا جائے گا اور یہ واقعہ کیرالہ کے ترقی پسند معاشرے پر دھبہ ہے۔قبائیلیوں کے حقوق کے لیے کام کرنے والی دھنیا رمن نے بتایا کہ ایک شخص دوسرے کے ساتھ سب سے برا یہ کر سکتا ہے کہ ایسی صورتحال میں سیلفی لے۔

مزید : عالمی منظر