دلی میں مسلم کش فسادات، ہندوﺅں کا مسجد پر حملہ ، کلس اتار پھینکا ، نارنجی جھنڈا لگادیا

دلی میں مسلم کش فسادات، ہندوﺅں کا مسجد پر حملہ ، کلس اتار پھینکا ، نارنجی ...
دلی میں مسلم کش فسادات، ہندوﺅں کا مسجد پر حملہ ، کلس اتار پھینکا ، نارنجی جھنڈا لگادیا

  



نئی دلی (ڈیلی پاکستان آن لائن) بھارت کے وفاقی دارالحکومت نئی دلی میں جاری مسلم کش فسادات کے دوران ہندو انتہا پسندوں نے مساجد کی توہین کا سلسلہ شروع کردیا۔

دلی کے علاقے اشوک نگر سے سوشل میڈیا پر سامنے آنے والی ویڈیوز میں ہندو انتہا پسندوں کو مسجد کی بے حرمتی کرتے دیکھا جاسکتا ہے۔ ویڈیو میں نظر آرہا ہے کہ کس طرح کچھ ہندو انتہا پسند مسجد کے مینار پر چڑھ کر اس کے لاﺅڈ سپیکر اور کلس اتار کر پھینک رہے ہیں اور ان کی جگہ پر بھارت کا قومی پرچم اور ہندو انتہا پسندی کی علامت نارنجی جھنڈا لگا رہے ہیں۔ پیر کے روز بھی دلی میں ایک مسجد کو نذرِ آتش کردیا گیا تھا۔

خیال رہے کہ نئی دلی میں تیسرے روز سے مسلم کش فسادات کا سلسلہ جاری ہے جس میں ہندو انتہا پسندوں کے ہاتھوں 10 افراد جان کی بازی ہارچکے ہیں جبکہ 150 سے زائد لوگ زخمی ہوئے ہیں۔

ہندو انتہا پسند تنظیم بجرنگ دل، آر ایس ایس اور بی جے پی کے کارکنوں نے مسلم علاقوں میں خوف و دہشت پھیلائی ہوئی ہے، مسلمانوں کے گھروں ، دکانوں اور مارکیٹوں کو پہلے ہی نذرِ آتش کیا جارہا ہے ، پولیس بھی بلوائیوں کو روکنے کے بجائے ان کا ساتھ دیتی نظر آرہی ہے۔

سوشل میڈیا پر سامنے آنے والی بعض ویڈیوز میں دیکھا جاسکتا ہے کہ کس طرح پولیس اہلکار ہندو بلوائیوں کو تحفظ فراہم کر رہے ہیں اور ان کے ساتھ مل کر مسلمانوں کو نشانہ بنا رہے ہیں۔ ایک ویڈیو میں پولیس کی موجودگی میں انتہا پسند ہندوﺅں کو پتھر جمع کرتے دیکھا جاسکتا ہے جبکہ ایک اور ویڈیو میں پولیس اہلکار اور ہندو انتہا پسند کچھ زخمی مسلمان نوجوانوں کو سڑک پر لٹا کر ان کو زبردستی وندے ماترم گانے پر مجبور کر رہے ہیں۔

مزید : بین الاقوامی