پنجاب اور کے پی میں الیکشن کی تاریخ نہ دینے کا اقدام چیلنج کریں گے : شاہ محمود قریشی 

  پنجاب اور کے پی میں الیکشن کی تاریخ نہ دینے کا اقدام چیلنج کریں گے : شاہ ...

  

لاہور(مانیٹرنگ ڈیسک) پاکستان تحریک انصاف (پی ٹی آئی) کے وائس چیئرمین اور سابق وزیر خارجہ شاہ محمود قریشی نے کہا ہے کہ حکومت کا مقصد ایجنڈے کے مطابق الیکشن کے نتائج حاصل کرنا ہے، پنجاب میں ایک متنازع شخصیت لگائی گئی ہے، یہ سب کچھ منصوبہ بندی کے تحت ہو رہا ہے اور ہم اس سے غافل نہیں ہیں، آئین کہتا ہے تحلیل کے ساتھ تاریخ بھی دی جانی چاہیے تھی، پنجاب میں تاریخ دی گئی نہ خیبر پختونخوا میں، ہم اس کو قانونی طور پر چیلنج کرنے کا ارادہ رکھتے ہیں۔اپنے ایک بیان میں شاہ محمود قریشی نے کہا کہ ہمارا اسمبلی میں واپس جانے کا کوئی ارادہ نہیں تھا، یہ ایک ایسا قائد حزب اختلاف چاہتے ہیں جو ان کے انگوٹھے کے نیچے ہو، ان کا مقصد اپنے ایجنڈے کے مطابق الیکشن کے نتائج حاصل کرنا ہے، پنجاب میں بھی یہی ہو رہا ہے اور ان کا مرکز میں بھی ایسا ہی کرنے کا ارادہ ہے۔انہوں نے کہا کہ ہم خیبر پختونخوا میں ایک شفاف الیکشن چاہتے تھے، اپوزیشن نے نامناسب نام تجویز کیا، ابھی فیصلے کی سیاہی سوکھتی نہیں اور الیکشن کمیشن سے نوٹیفکیشن جاری ہو جاتا ہے، ان کی الیکشن کروانے کی نیت نہیں، یہ سو جتن کریں گے، سو بہانے تلاش کریں گے الیکشن نہ کروانے کے۔

شاہ محمود قریشی

مزید :

صفحہ آخر -