اے جنوں پھر مرے سر پر وہی شامت آئی ۔۔۔۔داستان اردو کے ممتاز شاعر آسی غازی پوری کی

اے جنوں پھر مرے سر پر وہی شامت آئی ۔۔۔۔داستان اردو کے ممتاز شاعر آسی غازی ...
اے جنوں پھر مرے سر پر وہی شامت آئی ۔۔۔۔داستان اردو کے ممتاز شاعر آسی غازی پوری کی

  

 تحریر: آغا نیاز احمد مگسی

آج ہم آپ کو اردو کے مقبول و معروف شاعر آسی غازی پوری  کی داستانِ فن مختصراً سنائیں گے  ۔ آسی غازی پوری کا شمار اردو کے ممتاز ترین شاعروں میں ہوتا ہے۔ ان کی پیدائش 21 دسمبر 1834ءکو سکندر پور ضلع بلیا (یوپی) میں ہوئی۔ نام محمد عبدالعلیم تھا۔ پہلے عاصی تخلص اختیار کیا پھر آسی۔ ابتدائی تعلیم اپنے نانا سے حاصل کی اس کے بعد جونپور چلے گئے اور مولانا عبدالحلیم فرنگی محلی سے معقولات کی تعلیم حاصل کی۔  آسی  ماہر طبیب بھی تھے۔ انھوں نے طب کی کوئی رسمی تعلیم حاصل نہیں کی تھی بلکہ اپنے ذوق اور ذاتی مطالعے سے اس فن میں مہارت حاصل کی۔ طالب علمی کے زمانے ہی سے شعر وسخن میں دلچسپی تھی۔ ناسخ کے شاگرد افضل الہٰ آبادی سے مشورہ سخن کیا۔ آسی کا دیوان ” عین المعارف “ کے نام سے شائع ہوا۔

 آسی کی شاعری متصوفانہ فکر کا تخلیقی بیان ہے۔ آسی کے بارے میں کہا جاتا ہے کہ میر درد کے بعد تصوف کے موضوعات کو شاعری میں برتنے والے وہ سب سے کامیاب شاعر ہیں۔یہ بے مثل شاعر  24 جنوری 1917ءکو غازی پور میں اس دنیا سے رخصت ہوا۔

آسی غازی پوری کے کلام میں سے انتخاب ملاحظہ کیجیے

دل دیا جس نے کسی کو وہ ہوا صاحب دل 

ہاتھ آ جاتی ہے کھو دینے سے دولت دل کی 

۔۔۔۔۔۔۔۔۔۔۔۔۔۔۔۔۔۔۔

درد دل کتنا پسند آیا اسے 

میں نے جب کی آہ اس نے واہ کی 

۔۔۔۔۔۔۔۔۔۔۔۔۔۔۔۔۔۔۔

میری آنکھیں اور دیدار آپ کا 

یا قیامت آ گئی یا خواب ہے 

۔۔۔۔۔۔۔۔۔۔۔۔۔۔۔۔۔۔۔

اے جنوں پھر مرے سر پر وہی شامت آئی 

پھر پھنسا زلفوں میں دل پھر وہی آفت آئی 

۔۔۔۔۔۔۔۔۔۔۔۔۔۔۔۔۔۔۔

وہ کہتے ہیں میں زندگانی ہوں تیری 

یہ سچ ہے تو ان کا بھروسا نہیں ہے 

۔۔۔۔۔۔۔۔۔۔۔۔۔۔۔۔۔۔۔

وہ پھر وعدہ ملنے کا کرتے ہیں یعنی 

ابھی کچھ دنوں ہم کو جینا پڑے گا 

۔۔۔۔۔۔۔۔۔۔۔۔۔۔۔۔۔۔۔

خدا سے ترا چاہنا چاہتا ہوں 

میرا چاہنا دیکھ کیا چاہتا ہوں 

طبیعت کی مشکل پسندی تو دیکھو 

حسینوں سے ترک وفا چاہتا ہوں 

۔۔۔۔۔۔۔۔۔۔۔۔۔۔۔۔۔۔۔

بیمار غم کی چارہ گری کچھ ضرور ہے

وہ درد دل میں دے کہ مسیحا کہیں جسے

۔۔۔۔۔۔۔۔۔۔۔۔۔۔۔۔۔۔۔

 وہ خط وہ چہرہ وہ زلف سیاہ تو دیکھو 

کہ شام صبح کے بعد آئے صبح شام کے بعد 

۔۔۔۔۔۔۔۔۔۔۔۔۔۔۔۔۔۔۔

 کس کو دیکھا ان کی صورت دیکھ کر 

جی میں آتا ہے کہ سجدا کیجیے 

۔۔۔۔۔۔۔۔۔۔۔۔۔۔۔۔۔۔۔

 ملنے والے سے راہ پیدا کر 

اس سے ملنے کی اور صورت کیا

مزید :

ادب وثقافت -