’میرا سابق شوہر میری بچیوں کو اغوا کر کے دبئی لے گیا‘
لاہور (ڈیلی پاکستان آن لائن) اداکارہ صوفیہ مرزا کا کہنا ہے کہ ان کی جڑواں بچیوں کو ان کے سابق شوہر نے اغوا کر رکھا ہے۔ انہوں نے پاکستانیوں سے رمضان کے مہینے میں ان کی بچیوں کی واپسی کی دعا کی درخواست بھی کی۔
صوفیہ مرزا نے ٹوئٹر پر مداحوں سے درخواست کی کہ وہ ان کی صاحبزادیوں زینب اور زنیرہ کی واپسی کیلئے دعا کریں۔ انہوں نے ’ زینب اور زنیرہ کو واپس لاﺅ‘ (#bringbackZainabZunairah) کا ہیش ٹیگ بھی استعمال کیا۔ اداکارہ نے بتایا کہ ان کے سابق شوہر نے ان کی بیٹیوں کو اغوا کر کے دبئی میں رکھا ہوا ہے، بچوں کی حوالگی کا کیس عدالت میں زیر سماعت ہے۔
My kids, my babies , ZAINAB and ZUNAIRAH . I request all of you to pls pray for them that Allah give them back to me sooner . Request all my fans and followers to pray in this holy month for my daughters to be back with me sooner and Allah keep them away from evil . Ameen . pic.twitter.com/cPc6wWZg7J
— Sophia Mirza (@IamSophiaMirza) May 25, 2019
صوفیہ مرزا کی 2006 میں پاکستانی نژاد نارویجن بزنس مین شیخ عمر فاروق ظہور کے ساتھ شادی ہوئی تھی تاہم دونوں میں 2009 میں طلاق ہوگئی ۔ دونوں کے ہاں پیدا ہونے والی جڑواں بچیوں کی کسٹڈی طلاق کے بعد صوفیہ مرزا کو دی گئی اور ان کا نام ای سی ایل میں ڈال دیا گیا تاکہ انہیں پاکستان سے باہر نہ لے جایا جاسکے لیکن اسی سال شیخ عمر فاروق ظہور نے جعلی پاسپورٹس کے ذریعے دونوں بچیوں کو اغوا کرلیا اور انہیں دبئی لے گیا۔
صوفیہ مرزا کے سابق شوہر عمر فاروق کا 2013 میں پاکستانی اداکارہ وینا ملک کے ساتھ بھی معاشقہ رہا اور دونوں شادی بھی کرنے والے تھے لیکن وینا ملک نے اسی سال اسد خٹک کے ساتھ شادی کرلی۔
صوفیہ مرزا کے سابق شوہر عمر فاروق پر مختلف ممالک میں فراڈ کے مقدمات بھی درج ہیں۔ وکی پیڈیا کے مطابق انہوں نے سوئٹزر لینڈ میں جعلی بینک قائم کرکے لوگوں کے ساتھ 120 ملین ڈالر کا فراڈ کیا۔ انہیں پاکستان اور ناروے کی عدالتوں کی جانب سے مختلف مقدمات میں سزائیں بھی سنائی جاچکی ہیں۔
