پیپلز پارٹی نے حکومت سے دو مطالبات کردیئے

اسلام آباد (ڈیلی پاکستان آن لائن) پیپلز پارٹی کے رہنما مصطفی نواز کھوکھرنے کہاہے کہ ہمارے دومطالبا ت ہیں کہ آصف زرداری کے ذاتی ڈاکٹر ز کو ان تک رسائی دی جائے اوردوسرا مطالبہ یہ ہے کہ یہ کیس کراچی میں چلنا چاہئے ۔
جیونیوز کے پروگرام ”کیپٹل ٹاک“میں گفتگو کرتے ہوئے مصطفی نواز کھوکھر نے کہا کہ آصف زرداری اپنی درخواست ضمانت پر دستخط کرنے کیلئے بھی تیار نہیں ہیں ، اس لئے ان کی ضمانت کی درخواست کیسے دائر کی جاسکتی ہے ؟ انہوں نے کہا کہ ہمارے دومطالبا ت ہیں کہ آصف زرداری کے ذاتی ڈاکٹر ز کوان تک رسائی دی جائے اوردوسرا مطالبہ یہ ہے کہ یہ کیس کراچی میں چلنا چاہئے ۔ حکومت نواز شریف کی رپورٹس پر شک کرکے مقدمہ بنانے کی کوشش کررہی ہے ۔
انہوں نے کہا کہ ہم کچھ چیزوں کی پرداپوشی کرجاتے ہیں ، پچھلے آٹھ دس سال میں اس ملک میں
جو تگ ودو رہی ہے وہ سیاستدانوں اور اسٹیبلشمنٹ کے درمیان رہی ہے ۔ پرویز مشرف کوملک سے باہر بھجوانے کافیصلہ میں نہیں سمجھتا کہ نوازشریف نے کیاہوگا ۔ انہوں نے کہا کہ سنگین غداری کیس کا فیصلہ ہوناچاہئے تاکہ پتہ چلے کہ جو شخص اس ملک میں آئین و قانون کی خلاف ورزی کرے گا ، اس کو یہ سزا ملے گی ۔