لاہور(سپورٹس رپورٹر) سپورٹس اینڈ یوتھ افیئرز ڈیپارٹمنٹ پنجاب کے زیر اہتمام کھیلتا پنجاب گیمز 2024ء کے ڈویژنل سطح کے مقابلوں کا افتتاح کردیا گیا ہے رنگارنگ افتتاحی تقریب جمنیزیم ہال نشترپارک سپورٹس کمپلیکس میں منعقد ہوئی ہے، کمشنر لاہور ڈویژن زید بن مقصود اورڈائریکٹرجنرل سپورٹس پنجاب خضر افضال چوہدری نے لاہور ڈویژن کی سطح پر کھیلتا پنجاب گیمز کا افتتاح کیا ہے،کمشنر لاہور زید بن مقصوداور ڈی جی سپورٹس پنجاب خضر افضال چوہدری نے ڈویژنل سطح کے مقابلوں کی ٹرافی کی رونمائی کی اور بیڈمنٹن کھیل کر میچ کا افتتاح کیا ہے، کھیلتا پنجاب گیمز کے ڈویژنل سطح کے مقابلوں کا افتتاح آج 25نومبر سے پنجاب کے تمام ڈویژنز میں کردیا گیا ہے، یہ مقابلے 25نومبر سے 4دسمبر تک ہوں گے۔
کمشنر لاہور زید بن مقصود نے افتتاحی تقریب سے خطاب کرتے ہوئے کہا ہے کہ کھیلتا پنجاب گیمز 2024کے ضلعی سطح کے مقابلے کامیابی سے منعقد ہوچکے ہیں اب25نومبر سے پورے پنجاب کے تمام ڈویژنز میں ڈویژنل سطح کے مقابلے شروع ہوگئے ہیں،کھیلتا پنجاب گیمز میں ایک لاکھ بیس ہزار کھلاڑی حصہ لے رہے ہیں،وزیراعلیٰ پنجاب کے ویژن کے تحت کھیلتا پنجاب گیمز کے مقابلے ضلعی سطح سے لے کر صوبائی سطح تک منعقد ہورہے ہیں،ضلعی سطح پر کھیلتا پنجاب گیمز میں 6 جبکہ ڈویژن سطح پر 12 کھیلوں کے مقابلے ہورہے ہیں، کمشنر لاہورزید بن مقصود نے مزید کہا ہے کہ کھیلوں سے صحت مند معاشرہ تشکیل پاتا ہے،ڈویژن سطح پر چاروں اضلاع کے بہترین ونر کھلاڑی اور ٹیمیں آمنے سامنے ہونگی، ڈی جی سپورٹس پنجاب خضر افضال چوہدری اور ان کی ٹیم نے کھیلتا پنجاب گیمز کیلئے بہترین انتظامات کیے ہیں۔
ڈائریکٹرجنرل سپورٹس پنجاب خضر افضال چوہدری نے افتتاحی تقریب کے موقع پر کمشنرلاہور زید بن مقصود کو سوینئر پیش کیا ہے۔افتتاحی تقریب میں ڈویژنل سپورٹس آفیسر لاہور رانا ندیم انجم نے بھی خطاب کیا ہے۔افتتاحی تقریب کے موقع پر ڈائریکٹر سپورٹس یاسمین اختر، ڈائریکٹر ایڈمن ڈاکٹر محمد کلیم، ڈائریکٹر یوتھ افیئرز رانا ندیم انجم، ڈپٹی ڈائریکٹرز ظہور احمد، عطاء الرحمن، چاند پروین، ڈسٹرکٹ سپورٹس آفیسر لاہور تنویر عباس اور مرد و خواتین کھلاڑیوں کی بڑی تعداد موجود تھی۔