اہم تجارتی علاقوں میں پارکنگ پلازوں کی تعمیراہم ضرورت ہے : پیاف
لاہور(کامرس رپورٹر)پاکستان انڈسٹریل اینڈ ٹریڈرز ایسوسی ایشنز فرنٹ (پیاف) نے ہال روڈ پر 6 منزلہ پارکنگ پلازہ کی تعمیر کے فیصلہ کو تاجر برادری کے لئے خوش آئند قرار دیا ہے۔دیگر اہم مارکیٹس میں بھی تاجر برادری کی مشاورت سے جگہ کا انتخاب کر کے پارکنگ پلازے تعمیر کئے جائیں۔لاہور شہر کی اہم تجارتی مارکیٹوں میں پارکنگ پلازوں کی تعمیر وقت کی اہم ضرورت ہے۔پارکنگ پلازے بننے سے ٹریفک کی روانی کے ساتھ ساتھ تاجروں کی مشکلات بھی کم ہوں گی۔اہم تجارتی مراکز میں پارکنگ کا مسئلہ انتہائی گھمبیر ہوتا جار ہا ہے۔مارکیٹوں میں پارکنگ کی جگہ نہ ہونے اور غلط پارکنگ کے باعث ٹریفک کا نظام درہم برہم ہو تا رہاہے اور عوام بشمول بزنس کمیونٹی کو کربناک صورتحال سے گزرنا پڑتا ہے۔ منٹوں کا سفر گھنٹوں میں طے ہونے سے کاروباری افراد کے قیمتی وقت کا ضیاع بھی ہوتا ہے۔ پیاف کے چیئر مین عرفان اقبال شیخ نے سیئر وائس چیئرمین تنویر احمد صوفی اور وائس چیئرمین خواجہ شاہزیب اکرم کے ہمراہ پریس ریلیز جاری کرتے ہوئے کہا کہ حکومتی سطح پر ایسے اقدامات بلا شبہ قابل تعریف ہیں۔ لاہور بزنس کمیونٹی کیلئے حب کی حیثیت رکھتا ہے یہاں مستقبل کی ضروریات کو مدنظر رکھ کر پارکنگ پلان اور ٹریفک مینجمنٹ کے نظام کو جدید تقاضوں کے مطابق اپ گریڈ کیا جائے ۔
