کشمیریوں کو اپنا دشمن سمجھنے کے بجائے بات چیت کی جائے،انجینئر رشید
سری نگر(کے پی آئی)عوامی اتحاد پارٹی کے سربراہ اور ایم ایل اے لنگیٹ انجینئر رشید نے نئی دہلی پر زور دیا ہے کہ وہ کشمیریوں کو اپنا دشمن سمجھنے کے بجائے ان کے ساتھ مسئلہ کے مستقل حل کیلئے با معنی مذاکرات کا آغاز کرے تاکہ پورے بر صغیر میں امن و چین لوٹ آسکے ۔ وہ بجبہاڑہ میں مشہور شاعر ، ادیب اور دانشور مرحوم غلام محمد شاد کو خراج عقیدت ادا کرنے کی غرض سے بلائی گئی تقریب میں بول رہے تھے جس میں دانشوروں، ادیبوں ، اسکالروں اور طلبا کی ایک اچھی تعداد نے شرکت کی ۔ انجینئر رشید نے اس موقعہ پر اپنی تقریر میں کہا کشمیری قوم نہ ہی اپنی قربانیوں پر کوئی سمجھوتہ کر سکتی ہے اور نہ ہی ہندوستان کی دشمن ہے لیکن تب تک شائد ہی کشمیر مسئلہ کے حل کیلئے نئی دلی اور اسلام آباد کو آمادہ کیا جا سکتا ہے جب تک نہ تمام سیاسی جماعتیں کم از کم مشترکہ پروگرام بنا کر لوگوں کو مایوسی کے دلدل سے نکالنے کیلئے متحد نہ ہوجائیں ۔افسوس یہ ہے کہ جہاں لوگوں کی زندگیاں کشمیر مسئلہ کی وجہ سے اجیرن بن گئی ہیں وہاں مختلف الخیال سیاستدان نا مسائد حالات سے اپنے لئے سیاسی محل بنانے کی دوڑ میں مشغول ہیں ۔
