ٹی 20ورلڈ کپ، شاہینوں نے تاریخ بد ل دی،بھارت کا غرور خاک میں ملا دیا 

دبئی(مانیٹرنگ ڈیسک،نیوز ایجنسیاں) ٹی ٹونٹی ورلڈ کپ میں پاکستان نے تاریخ رقم کر دی،شاہینوں نے بھارتی سورماؤں کو چاروں شانے چت کرتے ہوئے پہلی بار ورلڈ کپ میں شکست دیدی ۔پاکستان نے 152رنز کا ہدف کپتان بابر  اعظم اور محمد رضوان کی ذمہ دارنہ بیٹنگ کی بدولت17.5اوورز میں بغیر کسی نقصان پر پورا کر لیااور10وکٹوں سے بھارت کو شکست دیدی۔ کپتان بابر  اعظم اور محمد رضوان نے گراؤنڈ کے چاروں اطراف دلکش سٹروکس کھیلے اور بھارتی باؤلرز کی ایک نہ چلنے دی  اور17.5 اوورز میں ٹارگٹ پورا کر لیا۔کپتان بابر اعظم 52گیندوں پر 68اورمحمد رضوان 55گیندوں پر78رنز بنا کر ناقابل شکست رہے۔ پاکستان کے فاسٹ باؤلر شاہین شاہ آفریدی کو شاندار بولنگ کرانے پر مین آف دی میچ کا ایوارڈ دیا گیا۔سپورٹس سٹی دبئی میں کھیلے  گئے   اہم میچ میں پاکستان نے ٹاس جیت کر پہلے بھارت کو بیٹنگ کی دعوت دی۔بھارت نے اننگز کا آغاز کیا تو روہت شرما کھاتا کھولے بغیر پہلی گیند پر پویلین لوٹ گئے۔اسکور ابھی 6تک پہنچا ہی تھا کہ دوسرے اوپنر لوکیش راہل بھی شاہین کی گیند نہ سمجھ سکے اور کلین بولڈ ہو گئے۔دو وکٹیں گرنے کے بعد ویرات کوہلی کا ساتھ دینے سوریا کمار یادیو آئے اور دونوں تیسری وکٹ کیلئے 25رنز جوڑ کر اسکور کو 31تک پہنچایا۔اس سے قبل کہ یہ شراکت خطرناک ثابت ہوتی، پاکستان نے چھٹے اوور میں حسن علی کو بالنگ پر متعارف کرایا جنہوں نے 11رنز بنانے والے سوریا کمار یادیو کو چلتا کردیا۔محمد حفیظ باؤلنگ کیلئے آئے تو پاکستان نے کیچ کی اپیل مسترد ہونے پر ریشابھ پنت کے خلاف ریویو لیا لیکن فیلڈ امپائر کا فیصلہ درست ثابت ہوا اور پاکستان کا ریویو ضائع ہو گیا۔اننگز کے12ویں اوور میں ریشابھ پنٹ نے جارحانہ انداز اپنایا اور حسن علی کو لگاتار 2چھکے لگانے سمیت اوور میں 15رنز بنائے لیکن اگلے ہی اوور میں شاداب خان کی گیند پر چھکا لگانے کی کوشش میں وہ اونچا شاٹ کھیل بیٹھے اور بالر نے اپنی ہی گیند پر کیچ لینے میں کوئی غلطی نہ کی۔بھارت کے وکٹ کیپر بلے باز نے آؤٹ ہونے سے قبل 39رنز کی اننگز کھیلی جبکہ دوسرے اینڈ سے کپتان ویرات کوہلی نے ذمے دارانہ بیٹنگ کا سلسلہ جاری رکھتے ہوئے نصف سنچری مکمل کر لی۔رویندرا جدیجا نے 13رنز کی اننگز کھیلی لیکن حسن علی کو چھکا لگانے کی کوشش میں متبادل کھلاڑی کو کیچ دے بیٹھے۔شاہین شاہ آفریدی نے عمدہ باؤلنگ کا سلسلہ جاری رکھا اور شاہین شاہ آفریدی نے بھارتی کپتان کوہلی کی اننگز کا خاتمہ کردیا، کوہلی نے49گیندوں پر57رنز بنائے۔اپنے اسپیل کی آخری گیند پر شاہین نے نوبال کردی اور فری ہٹ پر پانڈیا نے ایک رن لیا اور انہیں رن آؤٹ کرنے کیلئے شاہین کی جانب سے کی گئی تھرو پر چوکا ہو گیا اور یوں انہوں نے اپنے اسپیل کی آخری گیند پر10رنز دے دئیے۔اننگز کے آخری اوور میں حارث رؤف نے پانڈیا کو پویلین لوٹا دیا اور بھارت کی ٹیم ساتویں وکٹ سے محروم ہو گئی۔بھارت نے مقررہ اوورز میں 7وکٹوں کے نقصان پر151رنز بنائے اور پاکستان کو فتح کیلئے 152رنز ہدف دیا ہے۔پاکستان کی جانب سے شاہین 3وکٹوں کے ساتھ سب سے کامیاب بالر رہے جبکہ حسن علی نے دو اور شاداب اور حارث نے ایک، ایک وکٹ لی۔152رنز ہدف کے تعاقب میں پاکستان نے اننگز کا آغاز کیا تو محمد رضوان نے بھوونیشور کمار کو چوکا اور چھکا لگا کر ان کا استقبال کیا دونوں بلے باز وں نے گراؤنڈ کے چاروں اطراف دلکش سٹروکس کھیلے اور بھارتی باؤلرز کی ایک نہ چلنے دی  اور18ویں اوور میں ٹارگٹ پورا کر لیا۔کپتان بابر اعظم 52گیندوں پر 68اورمحمد رضوان 55گیندوں پر78رنز بنا کر ناقابل شکست رہے۔
تاریخ رقم

اسلام آباد،لاہور،کراچی،پشاور،کوئٹہ، مظفر آباد، سکردو(مانیٹرنگ ڈیسک،نیوزایجنسیاں) ٹی ٹونٹی ورلڈ کپ کے میچ میں روایتی حریف بھارت کے خلاف پاکستانی شاہینوں کی جیت کی خوشی میں آزادکشمیر اورگلگت بلتستان سمیت پورے ملک میں بھرپور جشن منایا گیا،بھارتی ٹیم کی جانب سے دیا گیا ہدف حاصل ہوتے ہی شائقین کرکٹ نعرہ تکبیر اللہ اکبر،پاکستان زندہ اور قومی ٹیم کے حق میں نعرے لگاتے ہوئے سڑکوں پر نکل آئے اور جیت کی خوشی میں بھنگڑے ڈالتے رہے، کئی مقامات پر ہوائی فائرنگ کی بھی اطلاعات ہیں،شائقین کرکٹ نے روایتی حریف بھارت سے کامیابی کی خوشی میں ایک دوسرے کو گلے لگ کر مبارکبادیں دی اور مٹھائیاں تقسیم کی گئیں خواتین جیت کی خوشی میں اپنی جذبات پر قابونہ رکھ سکیں اور ان کی آنکھوں سے خوشی کے آنسو جاری ہو گئے۔ نوجوان شائقین کرکٹ قومی ٹیم کی جانب سے ہدف حاصل ہوتے ہی نعرہ تکبیر اللہ اکبر،پاکستان زند ہ باد، قومی ٹیم زندہ باد کے نعرے لگاتے ہوئے سڑکوں پر نکل آئے۔شائقین کرکٹ ہاتھوں میں پاکستان کے پرچم تھام کر نعرے لگاتے ہوئے بھنگڑے ڈالتے رہے۔ کسی ناخوشگوار واقعہ سے نمٹنے کیلئے پولیس کی بھاری بھی تعینات رہی۔ بعض علاقوں میں قومی ٹیم کی کامیابی کی خوشی میں ہوائی فائرنگ بھی کی گئی جبکہ کئی مقامات پر آتش بازی بھی کی گئی۔دوسری طرف بھارت کے خلاف ٹی 20ورلڈ کپ میں تاریخی کامیابی حاصل کرنے پر وزیراعظم،صدر مملکت سمیت دیگر حکومتی و سیاسی شخصیات نے قومی کرکٹ ٹیم کو مبارکباد دی ہے۔وزیر اعظم عمران خان نے سماجی رابطے کی ویب سائٹ ٹوئٹر پر جیت پر قومی کرکٹ ٹیم کو مبارکباد دی اور لکھا کہ پاکستانی کرکٹ ٹیم اور کپتان بابر اعظم کو مبارک ہو، بابر اعظم نے ٹیم کو بہتر طور پر لیڈ کیا۔عمران خان نے کہا کہ شاہین آفریدی اور محمد رضوان نے بھی بہترین کارکردگی کا مظاہرہ کیا جبکہ پوری قوم کو آپ سب پر فخر ہے۔صدر مملکت ڈاکٹر عارف علوی نے بھی پاکستان کی جیت پر مبارکباد دی اور کہا کہ 10 وکٹ سے میچ جیتا،ہمیں ٹیم پر فخر ہے جبکہ پاک بھارت میچ میں بہترین کھیل دیکھنے کو ملا۔وفاقی وزیر داخلہ شیخ رشید نے کہا کہ پاکستانی کرکٹ ٹیم اور قوم کو میچ جیتنے کی مبارکباد، روایتی حریف سے میچ تھا، ہمارا فائنل آج تھا، پوری قوم کو فتح مبارک ہو، پاکستانی ٹیم نے پوری جرات سے ولولے اور بہادری سے میچ جیتا۔وزیر خارجہ مخدوم شاہ محمود نے قومی کرکٹ ٹیم کو شاندار کامیابی پر مبارکباددیتے ہوئے کہاکہ شاہینوں نے یادگار کھیل کا مظاہرہ کر کے پوری قوم کے دل جیت لیے جبکہ بابر اعظم، محمد رضوان، شاہین آفریدی سمیت پوری ٹیم کو عمدہ کارکردگی کا مظاہرہ کرنے پر دلی مبارکباد پیش کرتا ہوں، آئندہ آنے والے میچز میں پاکستانی ٹیم کی کامیابی کیلئے دعا گو ہوں۔سابق صدر آصف علی زرداری نے بھی کرکٹ ٹیم کو مبارکباد دیتے ہوئے کہا کہ قوم کی دعاؤں سے کرکٹ ٹیم کی فتح ہوئی، ثابت ہوا کہ ہمارے کرکٹ کھلاڑی مد مقابل ٹیم کو شکست دینے کی صلاحیت رکھتے ہیں۔فتح پر پاکستان کرکٹ بورڈ کو بھی مبارکباداور کہا کہ شاندار کارکردگی پر پاکستانی ٹیم کو شاباش۔پاکستان پیپلزپارٹی کے چیئرمین بلاول بھٹو زرداری کی بھارت کے خلاف ٹی ٹوئنٹی کرکٹ میچ میں قومی ٹیم کی فتح پر قوم کو مبارک باد اور کہا کہ بابر اعظم، محمد رضوان اور شاہین آفریدی سمیت پوری پاکستانی ٹیم نے بہترین کارکردگی کا مظاہرہ کیا۔بلاول بھٹو زرداری ٹی 20 کرکٹ ورلڈکپ میں روایتی حریف بھارت کو شکست دے کر قومی ٹیم نے ہر پاکستانی کا سر فخر سے بلند کردیا،یہ وقت ہے کہ کرکٹ کھیلنے والے ممالک اپنی ٹیم بھیج کر پاکستان میں انٹرنیشنل کرکٹ کی بحالی میں اپنا کردار ادا کریں۔صدر مسلم لیگ (ن) شہباز شریف نے بھی انے جوش کا اظہار کرتے ہوئے کہا کہ کیا میچ تھا، دونوں ٹیموں میں جوڑ کا میچ ہی نہیں تھا،پاکستان کے تمام کھلاڑیوں کو مبارکباد، ویل ڈن گرین ٹیم۔سینیٹ میں قائد حزب اختلاف یوسف رضا گیلانی نے بھارت کے خلاف ٹی 20 کرکٹ میچ میں قومی ٹیم کی فتح پر قوم کو مبارک باد دیتے ہوئے کہا کہ پوری پاکستانی ٹیم نے بہترین کارکردگی کا مظاہرہ کیا، ورلڈکپ میں روایتی حریف بھارت کو شکست دے کر قومی ٹیم نے ہر پاکستانی کا سر فخر سے بلند کردیا ہے۔ا۔وزیر اعلیٰ خیبر پختونخوا محمود خان نے پاک انڈیا میچ میں شاندار کامیابی پر پاکستانی ٹیم اور قوم کو مبارکباد دیتے ہوئے کہا کہ قومی ٹیم کی مزید کامیابیوں کے نیک خواہشات کا اظہار کرتا ہوں، کپتان بابر اعظم، محمد رضوان اور شاہین آفریدی نے بہترین کارکردگی کا مظاہرہ کیا جبکہ قومی ٹیم کی مجموعی کارکردگی شاندار رہی۔بھارت کو ٹی 20ورلڈ کپ میں 10وکٹوں سے عبرتناک شکست دینے پر آرمی چیف جنرل قمر جاوید باجوہ نے بھی گرین شرٹس کو مبارکباد دیتے ہوئے کہا کہ پاکستانی ٹیم نے ہمارا سر فخر سے بلند کردیا ہے۔پاک فوج کے شعبہ تعلقات عامہکے مطابق آرمی چیف جنرل قمر جاوید باجوہ نے دبئی انٹرنیشنل کرکٹ سٹیڈیم میں بھارت کو ٹی 20ورلڈ کپ میں پہلی مرتبہ عبرتناک شکست دینے پر پاکستانی ٹیم کو مبارکباد دیتے ہوئے کہا کہ  ٹیم نے ٹی 20 ورلڈ کپ میں بھارت کے خلاف زبردست کامیابی حاصل کی اورپاکستانی ٹیم نے ہمارا سر فخر سے بلند کردیا ہے۔
جشن، مبارکباد