سپریم کورٹ ؛سینئر وکیل قتل کیس میں برطرف اے ایس آئی کی سروس بحالی کی اپیل خارج
اسلام آباد(ڈیلی پاکستان آن لائن)سپریم کورٹ نے سینئر وکیل سردار خان قتل کیس میں برطرف اے ایس آئی کی سروس بحالی کی اپیل خارج کردی، چیف جسٹس پاکستان نے کہاکہ میں آپ کو سپریم کورٹ کے کمرہ عدالت نمبر ایک کی مثال دیتا ہوں،عدالت کے باہر تعینات اہلکار کھانا کھانے جائیں اور حملہ ہو جائے تو کیا یہ موقف تسلیم ہوگا؟
نجی ٹی وی چینل دنیا نیوز کے مطابق سینئر وکیل سردار خان قتل کیس میں برطرف اے ایس آئی کی سروس بحالی کی اپیل پر سماعت ہوئی،چیف جسٹس پاکستان قاضی فائز عیسیٰ کی سربراہی میں 3رکنی بنچ نے کیس کی سماعت کی،وکیل درخواست گزار نے کہاکہ میرا موکل سحری کیلئے کینٹین گیا تو ملزم ہسپتال سے بھاگ گیا، جسٹس اطہر من اللہ نے کہاکہ آپ کے موکل نے تسلیم کیا کہ اس نے ڈیوٹی کی جگہ چھوڑ کر غفلت کا مظاہرہ کیا۔
چیف جسٹس پاکستان نے کہاکہ سحری ہسپتال میں ملزم کے سامنے بھی کی جا سکتی تھی،آپ کا موکل ڈیوٹی کی جگہ چھوڑ کر گیا تو ملزم فرار ہوا،جسٹس اطہر من اللہ نے کہاکہ اے ایس آئی نے ڈیوٹی کی جگہ چھوڑ کر مس کنڈکٹ کیا۔
چیف جسٹس پاکستان نے کہاکہ میں آپ کو سپریم کورٹ کے کمرہ عدالت نمبر ایک کی مثال دیتا ہوں،عدالت کے باہر تعینات اہلکار کھانا کھانے جائیں اور حملہ ہو جائے تو کیا یہ موقف تسلیم ہوگا؟ایسی غفلت سے تو دہشتگردوں کو حملہ کرنے کا موقع ملتا ہے ، اہلکار کی موجودگی میں ملزم جھگڑا کرکے فرار ہوتا تو صورتحال مختلف ہوتی، پولیس ایک منظم فورس، قواعدوضوابط کے تحت کام کرتی ہے،عدالت نے درخواست گزار علی سید کی سروس بحالی کی اپیل خارج کردی۔
