1500 روپے ادھار واپس نہ کرنے پر خاتون کو برہنہ کرکے سرعام تشدد
نئی دہلی (ڈیلی پاکستان آن لائن) بھارتی ریاست بہار میں 1500 روپے ادھار واپس نہ کرنے پر سفاک ملزمان نے خاتون کو برہنہ کرکے سرعام تشدد کا نشانہ بنایا اور اس کے منہ پر پیشاب کیا۔
بھارتی میڈیا کے مطابق ریاست بہار کے ایک گاؤں میں خاتون رات گئے برہنہ حالت میں سڑکوں پر بھاگتی ہوئی نظر آئی جو اپنی جان بچانے کے لیے دہائیاں دے رہی تھی۔ قریبی آبادی کے لوگوں نے خاتون کو پناہ دی اور کپڑے پہنائے۔ جس کے بعد پولیس کو طلب کیا گیا ، خاتون نےپولیس کو بتایا کہ اس کے شوہر پرمود سنگھ نے گاؤں کی بااثر شخصیت سے 1500 روپے ادھار لیے تھے اور یہ رقم لوٹا بھی دی تھی لیکن ملزمان نے سود کا تقاضا کرنا شروع کردیا۔پولیس کو دیئے گئے بیان میں خاتون کا مزید کہنا تھا کہ ملزمان نے ادھار کی رقم پر سود کی ادائیگی سے انکار پر شوہر کے ہمراہ مجھے بھی گھر سے اُٹھا کر اپنے ڈیرے میں بند کردیا۔
خاتون نے بتایا کہ ان بااثر ملزمان نے برہنہ کرکے مجھے تشدد کا نشانہ بنایا اور میرے منہ پر پیشاب کیا۔ جب رات ہوگئی تو میں کسی طرح اپنی جان بچاکر بھاگ آئی۔ پولیس نے مقدمہ درج کرلیا تاہم اب تک کوئی کارروائی عمل میں نہیں لائی گئی۔
