پشاور(سٹاف رپورٹر)وزیر اعلی خیبر پختونخوا علی امین گنڈاپور سے پاکستان میں تعینات برٹش ہائی کمشنر جین میرئیٹ نے بدھ کے روز وزیر اعلیٰ ہا_¶س پشاور ملاقات کی۔ملاقات میں باہمی دلچسپی کے امور اور خطے میں امن و امان کی صورتحال پر تبادلہ خیال کیا گیا۔ خصوصی طور پر صوبے میں برطانوی حکومت کے تعاون سے جاری عوامی فلاح و بہبود کے منصوبوں پر گفتگو کی گئی۔ اس موقع پر سماجی شعبوں میں صوبائی حکومت اور برطانوی اداروں کی شراکت داری اور تعاون کو مزید وسعت دینے پر اتفاق پایا گیا۔ مزید برآں برطانوی ہائی کمشنر نے سیڈ اور ایس این جی پروگرامز کے بعد صوبے میں ایک نیا پروگرام شروع کرنے کا عندیہ دیا۔ وزیر اعلیٰ علی امین گنڈاپور کا اس موقع پر کہنا تھا کہ صوبائی حکومت برطانوی حکومت کے ذیلی اداروں خصوصا سیڈ اور ایس این جی پروگرام کی معاونت کو قدر کی نگاہ سے دیکھتی ہے، ان پروگرامز نے صوبائی حکومت کے محکموں کی استعداد کار بڑھانے میں اہم کردار اد کیا ہے جس کے لیے ہم سیڈ اور ایس این جی کی ٹیمز اور برطانوی حکومت کے شکر گزار ہیں۔ وزیر اعلیٰ نے کہا کہ صوبائی حکومت سیڈ اور ایس این جی پروگراموں کے تسلسل کو جاری رکھنے کی خواہاں ہے، اس وقت صوبائی حکومت کو کلائمیٹ چینج کے چیلنجز درپیش ہیں اور ہم کلائمیٹ چینج کے اثرات سے نمٹنے کے لئے خطیر سرمایہ کاری کر رہے ہیں۔ اس کے علاوہ حالیہ سیلابوں سے تباہ شدہ انفراسٹرکچرز کی بحالی کا عمل بھی جاری ہے۔ اسی طرح وزیر اعلیٰ نے کہا کہ ان کی حکومت معاشی ترقی خصوصا ضم اضلاع میں روزگار کے مواقع کی فراہمی پر خصوصی توجہ دے رہی ہے، ترقیاتی وسائل کے بہتر استعمال کے لئے ترقیاتی منصوبوں کی موثر پلاننگ اور شفافیت کے لئے سرکاری امور کی ڈیجیٹائزیشن پر کام جاری ہے۔ صوبائی حکومت کو ان شعبوں میں بین الاقوامی شراکت دار اداروں کے تعاون کی ضرورت ہے۔ علی امین گنڈاپور کا مزید کہنا تھا کہ صوبے کو امن و امان کے مسائل کا سامنا ہے، جب تک افغانستان میں حالات ٹھیک نہیں ہونگے، خطے میں پائیدار امن کا قیام ممکن نہیں۔ انہوں نے کہا کہ اس مسئلے کے مستقل حل کے لئے مذاکرات اور جرگوں کا راستہ اپنانے کی ضرورت ہے۔ وزیر اعلیٰ نے کہا کہ خیبر پختونخوا نے کئی عشروں تک اپنے افعان بہن بھائیوں کی مہمان نوازی کی ہے، اب بھی ہم افغان مہاجرین کی باعزت انداز میں واپسی چاہتے ہیں اور صوبائی حکومت وطن واپس جانے والے افعان مہاجرین کو ہر ممکن سہولیات فراہم کر رہی ہے۔