آپ لوگ جب جیل میں تھے ،تومیڈیا سے بات کر سکتے تھے،پیشیوں پر آتے تھے مگر یہاں عمران خان کو واٹس ایپ کال پر پیش کیا جارہا ہے،عاصمہ شیرازی کے سوال پر رانا ثنا اللہ نے کیا جواب دیا؟جانیے

اسلام آباد(ڈیلی پاکستان آن لائن)سینئر صحافی عاصمہ شیرازی کے عمران خان کی واٹس ایپ کال پر پیشی سے متعلق سوال پر رانا ثنا اللہ کا مؤقف سامنے آگیا۔

نجی ٹی وی چینل ’’ہم نیوز‘‘ کے پروگرام ’’فیصلہ آپ کا‘‘ کی اینکرپرسن عاصمہ شیرازی نے وزیراعظم کے مشیر سیاسی امور رانا ثنا اللہ سے سوال کیا کہ آپ لوگ جب جیل میں تھے ،آپ میڈیا سے بات کر سکتے تھے، پیشیوں پر  عدالت آتے تھے مگر یہاں عمران خان کو واٹس ایپ کال پر پیش کیا جارہا ہے،ان کی کوئی تصویر نظر نہیں آتی،وہ کہیں باہر نہیں آسکتے ، وہ عدالتوں کے سامنے خود پیش نہیں ہوسکتے،اس طرح کے ماحول میں کیا حاصل ہوگا، اس سے حکومت کو کوئی فائدہ حاصل ہو سکتا ہے۔

وزیراعظم کے مشیر سیاسی امور نے کہا کہ بات یہ ہے جب وہ ہر وقت عدالت کے باہر تماشا لگائیں گے،وہ عدالت کو ڈسٹرب کریں گے،عدالت اپنے معاملات چلانے کیلئے جو مناسب طریقہ کارسمجھے گی وہ کرے گی۔

رانا ثنا اللہ نے کہاکہ آپ بتائیں میاں نوازشریف نے ڈھائی  تین سو پیشیاں بھگتی ہیں،کس پیشی پر انہوں نے عدالتی نظام کو درہم برہم کیا؟کس پیشی پر انہوں نے عدالت کے باہر ہنگامہ آرائی کی یا کروائی؟وہ ہمیشہ خود جاتے یا مریم نواز ان کے ساتھ ہوتی تھیں،یہ ہر دفعہ ہی عدالت کے باہر تماشا لگاتے ہیں،جب عمران خان گرفتار نہیں ہوئے  تھے اور عدالتوں میں پیش ہوتے تھے کس طرح سے یہ پیش ہوتے تھے،لوگوں کو کال دیتے تھے چار چار ہزار آدمی ،دو دو ہزار آدمی،عدالتوں کو اس طرح سے درہم برہم کرتے تھے کہ معزز جج صاحبان کو ہی کمرہ چھوڑ کر پیچھے جانا پڑتاتھا،یہ تماشے جب آپ کریں گے توان تماشوں کو کنٹرول کرنے کیلئے کوئی نہ کوئی طریقہ اپنایا جائے گا،عدالت جو مناسب سمجھتی ہے وہ اس کے مطابق اپنے کام کو چلاتی ہے۔