اسلام آباد(ڈیلی پاکستان آن لائن)190ملین پاؤنڈ کیس میں بانی پی ٹی آئی اور بشریٰ بی بی کی سزا معطلی کی درخواستوں پر سماعت نیب کے سپیشل پراسیکیوٹر کی عدم دستیابی کے باعث بغیر کارروائی ملتوی کر دی گئی۔
نجی ٹی وی چینل جیو نیوز کے مطابق اسلام آباد ہائیکورٹ میں بانی پی ٹی آئی اور بشریٰ بی بی کی 190ملین پاؤنڈ کیس میں سزا معطلی کی درخواستوں پر سماعت ہوئی،چیف جسٹس سردار سرفراز ڈوگر اور جسٹس اعظم خان پر مشتمل ڈویژن بنچ نے سماعت کی،وزیراعلیٰ کے پی علی امین گنڈاپوراور بانی پی ٹی آئی کی بہنیں کمرہ عدالت میں موجود تھیں۔
درخواست گزاروں کی جانب سے بیرسٹر سلمان صفدر عدالت میں پیش ہوئے،سلمان صفدر نے کہاکہ دس سے 15مرتبہ اس عدالت سے اپروچ کیا مگر کبھی لا ء اینڈ آرڈر کی صورتحال پیدا نہیں ہوئی، آج عدالت کے باہر ملٹی لیئرسکیورٹی ہے، کورٹ روم پہنچنے میں رکاوٹیں اور دقت ہے،سینئر وکیل ہونے کے ناطے یقین دلاتا ہوں کہ آپ کی کورٹ میں کبھی ڈسپلن کا ایشو نہیں ہوگا۔
بیرسٹر علی ظفر اور سلمان اکرم راجہ نے بھی کورٹ تک پہنچنے میں مشکلات سے آگاہ کیا، چیف جسٹس سرفراز ڈوگر نے کہاکہ میں آپ سے معذرت خواہ ہوں۔
نیب پراسیکیوٹر رافع مقصود نے کہاکہ اس کیس میں نیب کے سپیشل پراسیکیوٹر شدید بیمار ہیں،سپیشل پراسیکیوٹر آج عدالت پیش نہیں ہو سکتے،بیرسٹر سلمان صفدر نے کہاکہ نیب ہمیشہ تاخیری حربوں سے کام لیتا ہے،تاریخ لینے والا یہ مشکل کام ان کو سونپا جاتا ہے،میرے پاس ایسے کیسز ہیں جن میں خاتون کی سزامعطلی جلد لگ جاتی ہے،کیس مشکل سے فکس ہوتا ہے اور مشکل سے ہمیں تاریخ ملتی ہے،یہ ساری رات انجوائے کرتے رہے اور میں ساری رات والیمز پڑھتا رہا، ان کو کم از کم مجھے آگاہ کرنا چاہئے تھا،عدالت نے کہا کہ نیب کو آخری موقع دیا جاتا ہے ورنہ ڈی جی نیب کو طلب کیا جائے گا، سلمان صفدر نے کہاکہ اس کیس میں آئندہ تاریخ بتا دی جائے، میرے کلائنٹس مجھے جانے نہیں دیتے ،چیف جسٹس نے کہاکہ مجھے پانچ منٹ دے دیجیئے، میں تاریخ بتا دیتا ہوں،نیب کے سپیشل پراسیکیوٹر کی عدم دستیابی کے باعث سماعت بغیر کارروائی ملتوی کردی گئی۔عدالت نے بانی پی ٹی آئی اور بشریٰ بی بی کی سزا معطلی کی درخواستوں پر سماعت 16اکتوبر تک ملتوی کردی۔