لاہور (ڈیلی پاکستان آن لائن) مسافر وین میں چھپا کر جعلی دودھ کے ڈرم سپلائی کرنے والا مافیا پکڑا گیا۔ قصور کے نواحی علاقے سے لاہور میں سپلائی کیے جانے والے 1ہزار لیٹر جعلی دودھ سے بھرے 10ڈرم تلف کردیئے گئے۔ ، ملزم گرفتارکر کے مقدمہ درج کر لیاگیا۔
ڈی جی فوڈاتھارٹی عاصم جاوید کا کہنا ہے مسافروں کی جگہ جعلی دودھ سے بھرے ڈرم رکھ کر لاہور لائے جا رہے تھے، موقع پر کیے گئے ٹیسٹ فیل، دودھ کے نام پر کیمیکلز سے تیار محلول چھپا کر لایا جا رہا تھا، دودھ جیسا محلول پاوڈر، پانی کیمیکل اور ویجیٹیبل آئل سے تیار کیا گیا تھا۔48 گھنٹے کی طویل ریکی کے بعد جعلی دودھ بردار مسافر وین کو گجومتہ سے پکڑا گیا۔ ڈرائیور کی بھاگنے کی کوشش ناکام بناکر گرفتار کر لیا گیا۔
ڈی جی فوڈاتھارٹی نے مزید کہا وزیراعلیٰ پنجاب کے ویژن کے مطابق جعلساز مافیا کا ہر ہتھکنڈا ناکام بنا کر پنجاب کو ملاوٹ سے پاک کرنے کے مشن پر ہیں ۔ جعلسازوں کے لیے پنجاب کی زمین تنگ کر دی گئی ہے۔