عافیہ کیساتھ غلط برتاؤ پر جیل عملہ تبدیل، رحم کی اپیل امریکی صدر کو بجھوا دی

عافیہ کیساتھ غلط برتاؤ پر جیل عملہ تبدیل، رحم کی اپیل امریکی صدر کو بجھوا دی

  

کراچی (آئی این پی) سندھ ہائیکورٹ نے امریکہ میں قید ڈاکٹر عافیہ صدیقی کی وطن واپسی سے متعلق وزارت خارجہ کے جواب جمع کرانے پر درخواست گزار کے وکیل کو جواب الجواب جمع کرانے کا حکم دیدیا۔ تفصیلات کے مطابق جسٹس محمد علی مظہر اور جسٹس یوسف علی سعید پر مشتمل دو رکنی بینچ کے روبرو امریکہ میں قید ڈاکٹر عافیہ صدیقی کی وطن واپسی سے متعلق درخواست کی سماعت ہوئی۔ دوران سماعت وزارت خارجہ کی جانب سے جواب جمع کرا دیا گیا۔ تحریری جواب میں کہا گیا کہ امریکہ سے ڈاکٹر عافیہ صدیقی کے ساتھ اچھے برتاؤ سے متعلق معاملہ اٹھایا ہے۔ ڈاکٹر عافیہ کے ساتھ جیل میں برے سلوک پر امریکی حکام نے تحقیقات بھی کیں۔ تحقیقات پر جیل کے ایک لوکل عملہ کو ہٹایا گیا ہے۔ ڈاکٹر عافیہ صدیقی کی رہائی کا معاملہ کئی مرتبہ اعلیٰ سطح پر اٹھایا گیا ہے۔ ڈاکٹر عافیہ صدیقی کی دستخط شدہ رحم کی اپیل امریکی صدر کو مارچ 2020 کو بھیجی جا چکی ہے۔ ڈاکٹر عافیہ صدیقی کے اہلخانہ کو صورتحال سے باقاعدہ آگاہ کر رہے ہیں۔عدالت نے وزارت خارجہ کے جواب پر درخواست گزار کے وکیل کو 5 مئی تک جواب الجواب جمع کرانے کا حکم دیدیا۔

حکومتی رپورٹ

مزید :

صفحہ آخر -