عبادات کے دوران حکومتی ہدایت پر عمل ہونا چاہئے: فیاض الحسن

  عبادات کے دوران حکومتی ہدایت پر عمل ہونا چاہئے: فیاض الحسن

  

لاہور(آئی این پی) صوبائی وزیر اطلاعات فیاض الحسن چوہان نے قوم کو رمضان کی مبارک باد دیتے ہوئے کہا ہے کہ رمضان المبارک میں عبادات کے دوران حکومت پاکستان کی ہدایات پر عمل ہونا چاہئے۔ مساجد اور امام بارگاہوں میں عبادت کی اجازت اعلامیے کی شرائط کی پابندی سے مشروط ہے۔وزیراطلاعات پنجاب فیاض الحسن چوہان نے پاکستان سمیت پوری دنیا میں بسنے والے مسلمان بھائیوں کو رمضان کی مبارک باد دی ہے۔ اپنے پیغام میں انہوں نے کہا کہ رمضان المبارک میں عبادات کے دوران حکومتِ پاکستان کی ہدایات پر عمل ہونا چاہیئے۔ حکومت نے علماء سے مشاورت کے بعد بیس نکات پر مبنی اعلامیہ جاری کیا ہے۔ حکومتی اعلامیہ مساجد اور امام بارگاہوں میں نماز اور تراویح کے لیے واضح ہدایات دیتا ہے۔ وزیر اطلاعات نے کہا کہ اعلامیہ میں عبادت گاہوں کی صفائی، صف بندی کی ترتیب اور نمازیوں کے درمیان وقفے کے لیے واضح ہدایات ہیں۔ امام بارگاہوں اور مساجد کی لوکل کمیٹیاں احتیاطی تدابیر کی پابندی یقینی بنائیں گی۔ پابندی کی خلاف ورزی یا شدید متاثرہ علاقوں کیلئے حکومت شرائط پر نظرِ ثانی کا اختیار رکھتی ہے۔فیاض چوہان نے کہا کہ امید ہے عوام اس سال ایک دوسرے کا خیال کرتے ہوئے رمضان کی برکتیں حاصل کرے گی۔ آئندہ دو ہفتے کرونا کے پھیلاؤ کو روکنے کیلئے نہایت اہم ہیں۔ بزدار حکومت وفاق کی رہنمائی میں کرونا کے خلاف ہر ممکن اور ضروری اقدامات کر رہی ہے۔

فیاض الحسن

مزید :

صفحہ اول -