این اے 22ضمنی الیکشن، عمران خان کے کاغذات نامزدگی درست قرار
پشاور (مانیٹرنگ ڈیسک) پشاور میں الیکشن ٹریبونل نے قومی اسمبلی کے ضمنی انتخابات میں این اے 22 مردان کیلئے پی ٹی آئی چیئرمین عمران خان کے کاغذات نامزدگی درست قرار دیدیئے، عدالت نے عمران خان کیخلاف درخواست خارج کر دی۔تفصیلات کے مطابق الیکشن ٹربیونل میں عمران خان کے قومی اسمبلی کے حلقہ این اے 22 مردان سے متعلق کا غذ ا ت نامزدگی کیخلاف دائر درخواست پر سماعت ہوئی۔ الیکشن ٹریبونل کے جسٹس اعجاز انور نے سماعت کی، درخواست گزاروکیل نے عدالت میں موقف اختیار کیا کہ عمران خان پہلے سے ہی قومی اسمبلی کا ممبر ہے، عمران خان نے دوسرے حلقے سے الیکشن لڑنے کی کوئی وجہ نہیں بتائی۔الیکشن کمیشن کے وکیل نے کہا الیکشن قانون میں ایک سے زیادہ حلقوں سے الیکشن پر کوئی پابندی نہیں، درخواست گزار وکیل نے موقف اختیار کیا کہ عمران خان کے اثاثے 3 کروڑ سے 30 کروڑ تک کیسے پہنچے، عمران خان نے اضافی اثاثوں کو ظاہر نہیں کیا۔عمران خان کے وکیل نے ٹریبونل کو بتایا عمران خان استعفیٰ دے چکے ہیں، اب اسمبلی کے ممبر نہیں، اگر اسمبلی کا ممبر بھی ہے تو قانون میں پھر بھی کوئی پابندی نہیں، جسٹس اعجاز انور نے استفسار کیا کہ توشہ خانہ اشیاء 2018ء میں ملیں تو کیوں ابھی تک ظاہرنہیں کیں، جس پر عمران خان کے وکیل نے بتایا ذاتی استعمال کی اشیاء الیکشن کمیشن کے سامنے ظاہر نہیں کی جاتیں، جن اشیاء کو ظاہر کرنا ہوتا ہے الیکشن کمیشن میں اسکی قیمت ظاہرکی گئی ہے، 329 اشیاء گفٹس میں سے عمران خان نے صرف 11 لی ہیں، توشہ خانہ ریفرنس الیکشن کمیشن میں فی الحال زیر سماعت ہے،عمران خان القادر ٹرسٹ کا بینفشری نہیں۔عمران خان کے وکیل نے بتایا عمران خان کی بیٹی کے حوالے سے الزامات کا کوئی ثبوت نہیں، نادرا ریکارڈ کے مطا بق عمران خان کی کوئی بیٹی نہیں، یہ درخواست بھی زائدالمعیاد ہے، وقت پر اعتراض جمع نہیں کیا گیا۔دلائل سننے کے بعد عدالت نے پہلے فیصلہ محفوظ بعدازاں مختصر فیصلہ سناتے ہو ئے ضمنی انتخابات این اے 22 مردان کیلئے عمران خان کے کاغذات درست قراردیئے ہوئے درخواست خارج کردی۔
عمران کاغذات
