حالیہ پرتشدد واقعات کی ذمہ دارلشکرجھنگوی ہے ، پھانسیاں رکواناچاہتی ہے: وزارت داخلہ
اسلام آباد(مانیٹرنگ ڈیسک) حکومت نے ملک میں فرقہ وارانہ تشدد کے حالیہ واقعات کا ذمہ دار کالعدم لشکر جھنگوی کو ٹھہراتے ہوئے کہا ہے کہ اس طرح کے پرتشدد واقعات کا مقصد اپنے ارکان کی پھانسیاں رکوانے کے لیے حکومت پر دباو¿ ڈالنا ہے،کالعدم تنظیم اپنے ساتھیوں کو جیلوں سے چھڑانے کے لیے عوام کو یرغمال بھی بنا سکتی ہے۔
مقامی میڈیا کے مطابق وزارت داخلہ کی طرف سے صوبوں کو لکھے گئے خط میں کہاگیاہے کہ کالعدم لشکر جھنگوی نے ملک میں دہشت گردی کی کارروائیوں کے لیے القاعدہ سے تعاون مانگا لیکن اس کے انکار پر اس تنظیم نے کالعدم تحریک طالبان کے ساتھ گٹھ جوڑ کیا جس کے بعد ملا فضل اللہ نے لشکر جھنگوی کو مالی معاونت کے ساتھ دیگر کاموں میں بھی تعاون کا وعدہ کیا ۔
وزارت داخلہ نے صوبوں کو لشکر جھنگوی کی جانب سے اپنے ساتھیوں کو جیلوں سے چھڑانے کے لیے عوام کو یرغمال بنانے کے خطرے سے بھی آگاہ کیا ہے جبکہ خط میں مزید کہا گیا ہے کہ ملک میں حالیہ شدت پسندی کے واقعات میں لشکر جھنگوی اور کالعدم تحریک طالبان ملوث ہیں اور ان فرقہ وارانہ پرتشدد واقعات کا مقصد حکومت پر اپنے ساتھیوں کی پھانسیاں رکوانے کے لیے دباو¿ ڈالنا ہے۔
وفاقی حکومت نے خفیہ اداروں کی رپورٹ کومدنظررکھتے ہوئے صوبوں کو سرکاری عمارتوں، امام بارگاہوں، مساجد سمیت دیگر اہم عمارتوں کی سکیورٹی بھی بہتر بنانے کی ہدایت بھی کی ہے۔
