تازہ تحقیق میں کاکروچ کے دودھ کے ایسے فوائد سامنے آگئے کہ لوگ گائے کا دودھ بھول جائیں
نئی دہلی(مانیٹرنگ ڈیسک) بھارتی سائنسدانوں نے کاکروچ کے دودھ کے ایسے فوائد دریافت کر لیے ہیں کہ جان کر لوگ گائے اور بھینس کے دودھ کو بھول جائیں گے۔ انڈیا ٹائمز کے مطابق بھارتی شہر بنگلور کے انسٹیٹیوٹ آف سٹیم سیل بائیولوجی اینڈ ری جنریٹو میڈیسن کے سائنسدانوں نے اپنی تحقیق کے نتائج میں بتایا ہے کہ مادہ کاکروچ اپنے جسم سے جو زردی مائل دودھ نکالتی ہے وہ گائے اور بھینس کے دودھ سے زیادہ مفید اور غذائی اجزاءسے بھرپور ہے۔
تحقیقاتی ٹیم کے سربراہ لیونارڈو چیواس کا کہنا تھا کہ ”لال بیگ کے دودھ میں پروٹین، ضروری امائنو ایسڈز، لحمیات اور شوگر کی مناسب مقدار موجود ہوتی ہے جو انسانوں کی غذائی ضروریات پوری کرنے کے لیے ناگزیر ہے۔اس دودھ میں پروٹین اس قدر پائے جاتے ہیں کہ اپنی افادیت کے پیش نظر مستقبل میں ’سپرفوڈ‘ قرار دیا جا سکتا ہے۔“سوشل میڈیا پر بھارتی سائنسدانوں کی اس تحقیق کا کافی ٹھٹھہ لگایا جا رہا ہے۔ ایک صارف نے لکھا ہے کہ ”میں نہیں جانتا کہ کاکروچ کا دودھ کیسا ہوتا ہے لیکن ایمانداری سے، اگر یہ دودھ مجھے لافانی بھی بنا دے تو میں پھر بھی اسے نہیں پیوں گا۔“