لاہور سمیت پنجاب میں ایک بار پھر دھند کا راج ،نظام زندگی مفلوج ہو گیا
لاہور/ملتان (آئی این پی ) پنجاب کے مختلف علاقوں سمیت گرد و نواح میں صبح سویرے دھند چھا گئی، لاہور کے مختلف حصوں میں صبح سویرے دھند کے بادل چھائے رہے ۔ ملتان شہر اور گرد و نواح میں شدید دھند کے باعث معمولات زندگی متاثر ہوگئے ، حد نگاہ 50 میٹر رہ گئی۔ دھند کے بادل فضا میں پھیلے ہوئے ہیں ، دھند نے ہر چیز دھندلا کر رکھ دی ، حد نگاہ بھی محدود ہو کر رہ گئی ، شہری علاقوں میں حد نگاہ پچاس سے ساٹھ میٹر جبکہ دیہی علاقوں میں حدنگاہ بیس سے تیس میٹر رہ گئی ۔ سڑکوں پر ٹریفک کی روانی متاثر ہو کر رہ گئی ۔محکمہ موسمیات کی مطابق کم سے کم درجہ حرارت سات اعشاریہ اٹھ جبکہ زیادہ سے زیادہ سترہ سینٹی گریڈ تک جانے کا امکان ہے۔ ہوا میں نمی کا تناسب سو فیصد ، دھند کے باعث ائیر پورٹ پر فلائیٹ آپریشن معطل ہوگیا۔ اسلام آباد جانیوالی پی کے 380 تاخیر کا شکار ، لاہور جانیوالی پی کے 386 تاخیر کا شکار ، کراچی سے آنیوالی پی کے 380 تاحال نہ پہنچ سکی دوسری طرف ریلوے سٹیشن پر ٹرینوں کی آمدورفت بھی متاثر ہوگئی ۔