پی ایس ایل 4کیلئے امپائرز اور میچ ریفر یز کے ناموں کا اعلان

پی ایس ایل 4کیلئے امپائرز اور میچ ریفر یز کے ناموں کا اعلان

  



لاہور(سپورٹس رپورٹر)پاکستان سپر لیگ (پی ایس ایل ) کے چوتھے ایڈیشن کے لیے امپائرز اور میچ ریفریز کے ناموں کا اعلان کردیا گیا ہے۔پاکستان کرکٹ بورڈ(پی سی بی ) کے مطابق مایہ ناز ملکی امپائر علیم ڈار فیملی مصروفیات اور انٹر نیشنل کمٹمنٹ کے باعث اس سال پاکستان سپر لیگ میں امپائرنگ کرتے نظر نہیں آئیں گے ،پی ایس ایل فور کے امپائرنگ پینل میں پاکستان کے احسن رضا، شوزیب رضا،طارق رشید ، آصف یعقوب ،راشد ریاض اور فیصل خان آفریدی ، انگلینڈ کے رچرڈ النگورتھ اور مائیکل گف اور ویسٹ انڈیز کے رینمور مارٹینز شامل ہوں گے ۔سری لنکا کے روشن ماہانامہ اور پاکستان کے محمد انیس اور جاوید لطیف ایونٹ کے میچ ریفریز ہوں گے ۔یاد رہے کہ پاکستان کرکٹ بورڈ (پی سی بی) کے زیر اہتمام پاکستان سپر لیگ کا چوتھا ایڈیشن 14 فروری سے یو اے ای اور پاکستان میں شروع ہوگا، لیگ کا فائنل 17مارچ کو کراچی میں کھیلا جائیگا، لیگ میں 6 ٹیمیں ٹائٹل کے حصول کیلئے پنجہ آزمائی کرینگی، لیگ رانڈ روبن فارمیٹ کے تحت کھیلی جائیگی۔اب تک اسلام آباد یونائیٹڈ کی ٹیم دو دفعہ اور پشاور زلمی کی ٹیم ایک بار لیگ جیت چکی ہے۔ پاکستان سپر لیگ کا افتتاحی میچ 14فروری کو دفاعی چمپئن اسلام آباد یونائیٹڈ اور لاہور قلندرز ٹیموں کے درمیان دبئی میں کھیلا جائیگا۔ پی ایس ایل کے چوتھے ایڈیشن میں فائنل سمیت کل 34 میچز کھیلے جائیں گے جس میں سے آخری 8 میچز پاکستان کے شہروں لاہور اور کراچی میں کھیلے جائینگے۔لاہور میں 3 میچز جبکہ فائنل سمیت پانچ میچز کراچی میں کھیلے جائینگے۔ نیشنل سٹیڈیم کراچی میں پہلا میچ 7 مارچ کو کراچی کنگز اور پشاور زلمی کے مابین فلڈ لائٹس میں ہوگا جبکہ لاہور میں پہلامیچ 9 مارچ کو لاہور قلندر اور اسلام آباد یونائیٹڈ کے مابین کھیلا جائیگا۔ پاکستان میں کھیلے جانے والے 8 میچز کے علاوہ دبئی انٹرنیشنل سٹیڈیم میں 14میچز اور چار میچز شیخ زید سٹیڈیم ابوظہبی میں کھیلے جائینگے۔شیدول کے مطابق پی ایس ایل میں شرکت کرنے والی تمام ٹیمیں ہر ٹیم کیساتھ دو دو میچز کھیلیں گی۔

جنوبی افریقہ کے اے بی ڈی ویلیئرز، زمبابوے کے برینڈن ٹیلرسمیت 19کھلاڑی پہلی بار پی ایس ایل میں ایکشن میں نظر آئینگے۔ پاکستان سپر لیگ کے چوتھے ایڈیشن کا فائنل میچ 17 مارچ کو کھیلا جائیگا جو نیشنل کرکٹ سٹیڈیم کراچی میں کھیلا جائیگا۔

مزید : کھیل اور کھلاڑی