ڈیبیو میچ کھیلنے والے نعمان علی نے کمال کر دیا، جنوبی افریقہ کو ’ہلا‘ کر رکھ دیا

ڈیبیو میچ کھیلنے والے نعمان علی نے کمال کر دیا، جنوبی افریقہ کو ’ہلا‘ کر رکھ ...
ڈیبیو میچ کھیلنے والے نعمان علی نے کمال کر دیا، جنوبی افریقہ کو ’ہلا‘ کر رکھ دیا
سورس:   Twitter

  

کراچی (ڈیلی پاکستان آن لائن) جنوبی افریقہ کرکٹ ٹیم کے خلاف پہلے ٹیسٹ میچ میں قومی ٹیم کی جانب سے ڈیبیو کرنے والے نعمان علی نے عمدہ باﺅلنگ سے اہم وکٹیں حاصل کر کے اپنی سلیکشن کو صحیح ثابت کر دیا ہے۔ 

تفصیلات کے مطابق پاکستان اور جنوبی افریقہ کی کرکٹ ٹیموں کے درمیان پہلا ٹیسٹ میچ نیشنل سٹیڈیم کراچی میں جاری ہے جس میں پاکستانی باﺅلرز نے عمدہ کارکردگی دکھاتے ہوئے مہمان ٹیم کو مشکل میں ڈال دیا ہے۔ 

پاکستان کی جانب سے ڈیبیو کرنے والے نعمان علی نے عمدہ باﺅلنگ کا مظاہرہ کرتے ہوئے کپتان کوینٹن ڈی کوک اور اوپننگ بلے باز ڈین ایلگر کی اہم وکٹیں حاصل کر کے اس میچ کو اپنے لئے یادگار بنا لیا ہے۔ 

نعمان علی نے 133 کے مجموعی سکور پر کوینٹن ڈی کوک کو پویلین کی راہ دکھائی اور وہ 23 گیندوں پر ایک چوکے کی مدد سے 15 رنز بنا کر عمران بٹ کے ہاتھوں کیچ ہو گئے جبکہ مجموعی سکور میں محض تین رنز کے اضافے کے بعد ہی ڈین ایلگر بھی ان کی گیند پر بابراعظم کے ہاتھوں کیچ ہو گئے۔ 

یہاں یہ امر قابل ذکر ہے کہ ڈین ایلگر مذکورہ ٹیسٹ میچ میں سب سے زیادہ رنز بنانے والے بلے باز ہیں جنہوں نے 106 گیندیں کھیل کر نو چوکوں کی مدد سے 58 رنز کی اننگز کھیلی اور اب سنچری بنانے پر نظریں مرکوز کئے ہوئے تھے تاہم نعمان علی نے ناصرف ان کا خواب چکناچور کر دیا بلکہ پاکستان کو انتہائی اہم کامیابی بھی دلائی۔ 

مزید :

کھیل -